KRALENDIJK – Ku orguyo Tourism Corporation Bonaire (TCB) ta anunsiá un tremendo oportunidat pa nos artistanan lokal. Royal Caribbean International ta buskando artista karibense lokal pa krea obra di arte riba su barku nobo, Star of the Seas, via e Programa pa Deskubrí Artista – Artist Discovery Program.

E Programa pa Deskubrí Artista di Royal Caribbean ta pone artistanan lokal nobo for di den region den spòtlait i ta trese nan kreatividat, talento i kultura bou di atenshon di e miónes di wéspet ku ta nabegá tur aña ku Royal Caribbean. E programa tin komo meta pa trese un sierto esfera i kultura den e kolekshonnan selektá na bordo di e barkunan, pa di e manera akí resaltá i selebrá e destinashonnan i komunidatnan ku ta para sentral den e vakansinan memorabel di Royal Caribbean. 

Ta selektá kuater artista pa subi na bordo i krea vários mural riba eskala grandi den un di e lokalidatnan na bordo di Star of the Seas, promé ku e barku bai nabega den área karibense for di ougùstùs 2025. Kada artista ta risibí un supsidio di e kompania krusero, ku ta varia for di $ 20.000 te mas ku $ 100.000, pa realisá nan vishon. 

Elesiër Angel, direktor interino statutario di TCB, a aksentuá importansia di e inisiativa akí: “Boneiru ta kas di un komunidat artístiko riku i diverso, i e programa akí ta ofresé un oportunidat inkreibel pa nos talentonan lokal pa haña mas popularidat internashonal. Nos ta enkurashá nos artistanan pa hasi uso di e plataforma akí pa mustra bunitesa, kultura i patrimonio di nos isla riba un esenario mundial.”

TCB ta enkurashá nos artistanan lokal na Boneiru pa partisipá na e tremendo oportunidat akí. E ganadónan lo traha estrechamente huntu ku e tim di konstrukshon nobo tras di e famoso barkunan di Royal Caribbean pa duna bida na nan konseptonan na Turku, Finlandia, kaminda Star of the Seas ta den konstrukshon.

Pa mas informashon tokante kon artistanan por entregá e obranan ku nan ke partisipá kuné, bai riba: https://www.royalcaribbeangroup.com/artist-discovery-program