KRALENDIJK – E parke di hunga den e bario Nieuw Amsterdam ta kasi kla pa uza. Último dianan a kita e kurá rondó di e tereno, di moda ku bishitantenan por tira un bista kaba. Sekretario di estado Vincent Karremans di Hubentut, Prevenshon i Deporte ta hasi un bishita na e kurá di hunga djabièrnè atardi den kareda di 1’or. Ounke e entrega ofisial ta tuma un tiki mas tempu, ta trahando duru pa kaba tur kos nèchi. Ta asta eliminá santu for di riba kaya i ta pinta pinturanan di última ora riba e murayanan.

Apesar di un retraso di dos luna e kura di hunga ta primintí di bira un di esunnan mas moderno na Boneiru. A traha un área spesial kaminda muchanan por kore baiskel, kompletamente ku bòrchinan di tráfiko pa un elemento edukativo. Tambe tin un felt di básketbòl, un pannakooi (un parti será ku waya, kaminda por hunga e.o. futbòl) i un slep grandi. Pa mayornan ku ta warda riba nan yunan, ta bai pone mesanan di piknik ainda.

Tambe tabatin atenshon pa plantashon ku diferente palu i mata, ounke falta un sistema di drep, lokual ta lanta e pregunta kon ta bai garantisá e mantenshon. Un otro punto di diskushon ta e echo ku anochi no por sera e parke, lokual ta lanta e pregunta si hóbennan ku ta keda sinta ratu largu e mésun kaminda ku muzik duru no ta bai tuma e parke di hunga over ku molèster di zonido. Segun Jantje Beton un bòrchi ku e reglanan na entrada lo por konsientisá  hóbennan.

Despues di su bishita na e parke di hunga sekretario di estado Karremans lo habri tambe e Cruyff Court nobo na Kaya Son Montuno 3 na Kralendijk. Esaki ta nifiká dos momentu importante pa deporte i rekreashon na Boneiru. 

Plannan i invershonnan den futuro 

Karremans ta bishitá St. Eustatius, Saba i por último Boneiru. Un pregunta importante ta ku si e sekretario di estado lo hiba kòmbersashon ku gobièrnu lokal tokante invershonnan adishonal. Reino a konsedé un presupuesto di 13 mion euro via un asina yamá Regiodeal, ku ta destiná pa desaroyo di un sentro multifunshonal na Boneiru. Aparte di esei ta keda insigur si lo uza e sèn aki tambe pa mantenshon di fasilidatnan di deporte eksistente, manera mantenshon atrasá di e kanchanan di tènis, konstrukshon di e kanchanan di padel (un deporte kresiente rònt mundu ku ta un kombinashon di e deportenan tènis i skòsh, ámbos deporte ku ta uza rèket) i e iluminashon na e kanchanan di tènis di bich.