KRALENDIJK – Di djaluna 26 di yüni pa djarason 28 di yüni, Selibon NV lo laga hasi un midishon di aire na e fòrnu di kima shushi na Lagun.

Na luna di mart Selibon NV a laga hasi un investigashon pa ku e influensia ku kimamentu di shushi tin riba bisendario. Resultado di e promé investigashon tabata preokupante i mesora Selibon a tuma akshon.

A para e fòrnu di kima shushi inmediatamente, wardando riba un segundo investigashon. Entre tantu, Selibon N.V. a kontratá un kompania Europeo pa hasi e segundo investigashon.

Segundo investigashon 

E segundo investigashon ku lo bai tuma lugá ta e asina yama “emissiemetingen”. Esaki ta un investigashon kaminda lo bai analisá e aire ku ta sali for di e fòrnu di kima shushi. E investigashon aki lo tuma lugá di 26 pa 28 di yüni 2023 na nos Lèntfel na Lagun. 

E kompania Protea Ltd. ta esun enkargá pa hasi e investigashon aki. Riba djaluna 26 di yüni 2023, algun funshonario di e direktorado di Supervishon i Mantenshon di Lei tambe lo tei presente huntu ku algun empleado di Selibon N.V. pa asina supervisá e investigashon aki. Selibon N.V. ya a informá kaba e Asosashon Pro Lagun, ku ta representa algun di e habitantenan di Lagun.

Resultado

Ta spera ku e resultadonan lo ta kla den un periodo di 2 siman. Unabes ku e resultadonan ta konosí, lo informá tur e partidonan enbolbí.

Di antemano Selibon N.V. ta pidi diskulpa pa kualke inkombiniensia ku e investigashon aki por trese kune pa habitantenan di Lagun.