Sindikalismo na Boneiru tabatin un siman éksitoso tras di lomba, kaminda e sindikato ABVO a sera un CAO ku Fundashon FKPD den e espíritu di e CAO di sektor di kuido di tantu Boneiru, Saba i Statia. Manera ta konosí AFBW huntu ku e sindikatonan ruman ALL IN ONE di Statia i SUPLUA di SABA a sinta ku henter e sektor di kuido di tantu Boneiru, Saba i Statia i a sera un CAO kolektivo pa henter e sektor aki. Pa loke ta 2025 un di e puntonan di lansa di AFBW lo ta pa drenta ku e mesun filosofia den otro sektornan di importansia pa nos desaroyo sosial-ekonómiko na Boneiru. Nos ta referí aki na sektor turístiko, mui en espeshal e sektor di horeca, e sektor di konstrukshon, e sektor di seguridat, e sektor di supermerkadonan i e sektor di pakusnan. Pronto lo kuminsá ku e kampaña pa esakinan. 

Banda di ABVO su CAO ku FKPD, AFBW a sera den e siman tras di lomba 2 CAO, uno na komienso di siman ku TELBO N.V. i uno na serada di siman ku Fundashon Cas Popular. Dos CAO ku a enserá mehorashon di kondishonnan laboral di e trahadó basá riba rèspèt i rekonosementu ku tantu e trahadó komo e dunadó di trabou ta demonstrá pa otro. Direktor di Fundashon Cas Boneriano a formulé asina korekto. Ela bisa: “Mi ta apresiá e forma ku mi trahahadónan ta ehersé nan labor ku pashon, amor i dedikashon i ta pései kaminda tin espasio mi no ta duda pa duna nan e rekompensa ku nan meresé”. I vise-presidente di AFBW na su turno na nòmber di trahadónan a trese dilanti: “ Fundashon Cas Boneriano ta un bon dunadó di trabou, e sa di balorá su trahadónan, p’esei AFBW tambe ta aktua den un forma responsabel ora di negoshá i ta pone semper dilanti kontinuidat di eksistensia di e kompania i kuné ekspanshon i o kresementu. Faktornan ku ta garantisá kuponan di trabou duradero pa tur trahadó.

Riba petishon di trahadónan di Contour Global AFBW a pidi mediadó pa organisá un referèndem na Contour Global pa asina haña e representashon legal di e interesnan laboral di e trahadónan. Esaki despues ku gerensia a nenga di rekonosé AFBW riba un base boluntario, apesar ku mediadó a prueba ku AFBW tabatin e gran mayoria(80%) di e trahadó organisá komo miembro pagadó di kontribushon. E referèndem lo ta dia 5 di febrüari awor i lo tuma lugá entre 1’or di merdia i 6’or di atardi na Jeugdhuis Jong Bonaire. Tur trahadó legalmente, esta pa lei mester haña oportunidat den e lapso di tempu ei pa bai vota ku un SI pa AFBW bira su representante legal. Pues palabra no mester ta hopi AFBW ta representá na 21 kompania ku tur ku un CAO ku bon kondishonnan laboral. Ta na kaminda 3 mas, pues ku Contour Global esaki lo bira 4 kompania mas ku AFBW lo sinta na mesa i negoshá un CAO ku deseonan hustu i rasonabel di parti di trahadónan.

Sindikalismo ta bai para abusunan laboral den institutonan komersial di akohida pa mucha despues di skol. Ku un determinashon firme, sindikalismo lo aserká tur dos gobièrnu, tantu lokal komo di Ulanda pa trese un paro den e desaroyo negativo den e mundo di krèsh di muchanan di 0 pa 4 aña i den e mundo di akohida despues di skol pa muchanan di 4 pa 12 aña. Tin hasimentu di negoshi pisá kaminda ta pone plaka i sèn komo prioridat riba interes di edukashon, seguridat i salubridat di e mucha ku netamente den e periodo di desaroyo aki ta super sensibel pa tur sorto di influensha. E situashon ta saliendo for di man i mester aktua. Mester bisa si ku ta algun apel putrí tin den e saku ku ta daña henter e saku.