Awe e pabien ta bai pa gerensia i trahadónan di Bonlab, ya ku djabièrnè último 14 di febrüari AFBW a firma un akuerdo básiko ku Bonlab pa un CAO nobo ku durashon di 2 aña, esta di 1 di yanüari 2025 te ku 31 di dézèmber 2026.

Ku firmamentu di e akuerdo aki a seya tambe ku Bonlab, un instituto lokal di 55 aña bieu lo kontinuá ku su operashonnan riba nos isla. Un operashon opvio ku un vishon i rumbo nobo ku un tim di personal nobo ku un determinashon positivo. Den konsulta i ku rèspèt pa otro su punto di bista i poniendo den balansa interes di e instituto pero tambe e interes di e trahadó a sera un akuerdo ku ta kuadra totalmente ku e fase di transformashon ku Bonlab ta pasando aden. Den kuadro di e konteksto aki, AFBW i Bonlab a traha palabrashonnan ku lo bai atendé tres tema di importansia pa e trahadónan den e añanan benidero, Ta trata di e temanan tokante kondishonnan laboral adekuá, formashon i vitalidat di e personal. Den un komunikado separá por tuma nota di e kondishonnan laboral mas importante ku lo forma e base pa un CAO nobo pa e trahadónan di Bonlab. Bonlab ta un ehèmpel klásiko di un logro komun a base di tur nanishi den mesun direkshon. For di 2012 Bonlab tabata bou di menasa serio pa disparsé. Sindikato a hunga un ròl importante den trese tur e partidonan envolví huntu pa para e wega makabre di eliminá Bonlab. Sindikato AFBW, Konseho Insular kompleto, Bestuurscollege, Bonaire Holding Maatschappij, Hunta di Komisario i gerente nobo den persona di Anneke Vissers a traha huntu i duna Bonlab un kara nobo, un vishon nobo un rumbo nobo i un determinashon di un tim nobo i hóben ku un mira positivo.

Nos kier rekordá trahadónan ku tin un regla nobo pa ora bo mèldu malu i bo no por traha. I esaki ta ku bo ta informá bo dunado di trabou ku bo ta malu i ku bo no por bin trabou. E dunadó di trabou mesora mester mèldu bo na Banko di Seguro Sosial kende despues di 3 dia ta tuma kontakto ku abo komo trahadó pa chèk ku ainda bo ta na kas. Despues di saminabo e dòkter di seguro ta determiná kusi  bo ta AO i pa kuantu tempu. Na e momento ei e dòkter di seguro ta informá bo dunadó di trabou ku e ta bin na remarke pa haña kompensashon di 80% di bo salario for di e promé dia ku bo a mèldu bo mes malu i no a bai traha. Pues e dunadó di trabou pa lei ta obligá di pagabo minimal 80% di bo salario pa e dianan ku bo no a bin traha. Si akaso e dunadó di trabou faya di mèldu bo e ta keda responsabel pa pago di bo salario. Tambe e mester sigui pagabo e salario maske ainda SVB no manda su kompensashon pe.

1 di mei 2025 DIA di LABOR. Nos a komprondé ku tras di kòrtina tin moveshonnan pa e aña aki si  rekordá DIA di LABOR komo e dia ku trahadónan a lucha i subi kaya pa liberá nan mes for di e kadena di abuso i eksplotashon laboral. I laga nos no kiboká nos mes. E lucha ku a hiba den añanan 1880 bin ariba no a disparsé ainda. Tampoko for di nos komunidat. Ainda nos tin e derecho pa duna otro e rekonosimentu pa e logronan sosial i ekonómiko ku huntu nos a i ta logrando i ku nos ta ankra den CAO. Pero tambe ainda nos mester keda alerta kontra e sombranan ku ketu bai kier abusá i eksplotá e klase trahadó. E 1 di mei aki nos lo ilustrá i duna rekonosimentu na e viktimanan ku a kai den nan lucha pa haña rekonosimentu pa e klase trahadó. Lo bo keda babuká.