KRALENDIJK – Un grupo di suidadano na Boneiru a start un akshon di firma pa asina purba konvensé Fundashon Mariadal pa prolongá e kombenio laboral ku e Neurólogo popular Richard Beukers. 

Hopinan di hopi esnan involví den e akshon ta indigná pa e echo ku lo ke ‘kore’’ ku Beukers.  “Porfin un neurólogo ku skucha pashènt i ku a tuma e molèster di siña nos idioma,” un di e personanan tras di e akshon di firma a bisa Awor.nu djarason atardi.  

Beukers a haña hopi apresio na isla, despues ku ela tuma kehonan serio di vários pashènt ku a operá lomba na Colombia na serio i a manda esakinan afó pa bai hasi operashon korektivo. 

E personanan ku a inisiá e akshon ta mira loke nan ta deskribí komo un mala fe di parti di Fundashon Mariadal  pa e desishon di no prolongá e kontrato ku Beukers. “Sin duda mester a bai buska Neurólogonan hulandes atrobe, ku ta bini aki kada bes pa algun luna pero ku no ta papia nos idioma, ni no ta skucha nos hendenan,” un otro persona ku ta envolví den e akshon a bisa.

Firma

Na final di djarason atardi, Rosemarie Winklaar, ku a prepará e listanan di firma, a raportá di algun shen di hende a firma e petishon pa mantené Beukers den servisio. Winklaar, konosí di su Busje Komt Zo, a stashoná su bùs djarason atardi banda di Tung Fong store rekolektá firma.

Fundashon Mariadal ainda no a komuniká aktivamente tokante e desishon di despedí Beukers.