KRALENDIJK- Skolnan na Boneiru ta bai sera un poko mas trempan e aña aki pa e fakansi di fin di aña, pa asina yuda frena e plamamentu di Covid-19 riba nos isla. Esaki gezaghèber Edison Rijna a anunsiá durante su konferensia di prensa djaweps atartdi. 

Den simannan tras di lomba skolnan i akohidanan di mucha a hunga un ròl basta importante den e problemátika di infekshon nobo riba nos isla. 

Tòg, asina Rijna a splika, no por generalisá, pasombra no ta tur skol. “Aktualmente ta mira ku den partikularmente na skolnan básiko i akohida di mucha ta mira e plamamentu”, asina Rijna a splika. Segun Rijna i dòkter Loes Jaspers, tòg a traha bon afsprak ku e diferente skolnan. 

Pa yuda frena a situashon aun mas tambe a disidí ku e añanan aki skolnan ta sera mas trempan pa e fakansi di pasku i aña nobo. Dia 17 di desèmber ta e último día di skol pa muchanan di skol pa ku aña 2021.