KRALENDIJK – Ta parse ku  ni dos dia despues di e informe tokante e problemanan ku e kònteiner supteráneo na Kaya Isla Riba, a realisá un solushon temporal. Kompania di prosesá sushi Selibon a laga sa kaba ku e infrastruktura sivil aktual no ta kumpli ku e eksigensianan pa  instalashon di e kònteinernan di sushi supteráneo. Resientemente a sera e buraku peligroso ku plachinan grandi di palu.

Ounke e plachinan aki ta prevení ku hendenan na pia òf muchanan ku ta hunga eibanda  ta kai den e buraku hundu di tres pa kuater meter, e solushon ta lanta interogatorio. A pega e plachinan na otro si, pero sinembargo ta parse fásil pa por trasladá nan. Ademas ta keda vago si ta kambia e medida temporal aki riba término korto pa un solushon struktural.

Den e buraku tabatin ya kaba un kapa di sushi i di awa i e hèkinan ku tin rondo di nan t’einan ainda pa protehá e área. Notabel ta ku gobièrnu lokal no a duna un reakshon ofisial ainda riba e situashon. Esaki ta remarkabel, ya ku diputado Anjelica Cicilia a deklará anteriormente ku pronto lo a bini un solushon definitivo.