PHILIPSBURG/WILLEMSTAD – Korte den promé instansha djalun a duna Z Air rason den un kaso ku a entamá kontra di minister di Transporte (TEATT) di Sint Maarten, pa loke ta trata pèrmitnan pa Z Air.  

Den su veredikto, Korte a husga ku  e kondishonnan adishonal ku e Autoridat di Aviashon Sivil di Sint Maarten (CAASM) a pone na e pèrmitnan di Z Air, ta ilegal i inesesario.

CAASM tabata eksigí ku un karta, firmá pa e autoridatnan di aviashon di Kòrsou (CCAA) i Merka (FAA), mester a wordu risibí. E karta aki lo mester a duna garantia tokante e supervisón riba e avion di Z Air ku ta registrá na Merka. Sint Maarten tabata pone ku no tabata kla kon e supervisón operashonal riba e operashonnan ta dividí entre Merka I e Autoridat di Aviashon Sivil di Kòrsou (CCAA).

Korte a determiná ku e minister no a supstanshá sufisientemente pakiko e karta aki tabata nesesario pa un operashon sigur. Segun Korte, e distribushon di responsabilidatnan ya ta sufisientemente regulá den e lenan i reglanan eksistente. Ademas, e kumplimentu di e kondishon, esta un deklarashon di e FAA, ta fuera di e kontrol di Z Air. Esaki, segun Korte, ta hasi e medidá desproporhonal.

Esaki ta nifiká ku e kondishonnan disputá a wordu anulá pa Korte i ku e permitnan ku Z Air a pidi for di komienso di 2024, mester wòrdu otorgá awor.

Korekto

Direktor di CCAA, Peter Steinmetz, den un rekashon na Awor.nu ta bisa di ta kontentu ku desishon di Korte. “Korte korektamente a husga ku kondishonnan adishonal na Z Air, diferente for di loke ya ta stipulá den e Protokolo di Reino, mester limitá na rekisitonan den e lei i reglanan nashonal. Den e kaso aki no tabatin ningun base pa e eksigenshanan adishonal,” segun Steinmetz a bisa.