RINCON- E vèlt di Stadion Antonio Trenidad ta kla pa weganan di Nation League, dia 28 awor. E selekshon di Boneiru pa promé biaha ta bai hunga su wega na Boneiru. 

Djárason anochi nan a hunga un wega di treinen kontra Vitesse i a gana e partido 7 pa nada. Durante e anochi, hefe di INDEBON Terrence De Jongh, a bisa Stadion na Rincon kla pa weganan di Nation League. “E vèlt ta kla. Un stadion nechi drecha pa entre otro weganan di dia 28 di mart. Awe e selekshon di Boneiru ta trein ku e ekipo di Vitesse. Fin di luna tur hende por bin wak e wega 28 di mart. Esaki ta un komienso. Esaki ta un komienso i ta sigui ku mas deporte den e nivel aki pa Boneiru. Nos ta deseá pa mira mas tantu hende posibel pa sostené e ekipo di Boneiru.”

Luti Balentin, dierktor di Federashon Futbal Boneriano tambe a keda kontentu. “Nos ta orguyoso di tin e stadion aki renobá. Awor no mester bai afó, pero nos por hunga wega na Boneiru mes. E stadion no ta ful kla, pero e parti ku ta importante, ku CONCACAF ta eksihí, ta kla. E kosnan rondó di e stadion ta den proseso i pa fin di luna nan ta kla. Boneiru ta bai partisipá tambe pa kopa di oro.”

Fondo

Diputado James Kroon, ku tambe tabata presente, a remarká ku no tabata un trabou fásil. “No tabata un trabou fásil. Mester a rekoudá fondo pa e proyekto. Fundashon Wega di Number  Boneiru i VWS, a pone fondonan huntu pa e logro esaki. Nos ekipo a bai na diferente okashon afó. Nan deseo ta pa un dia hunga weganan na kas. Luti Balentin i Steven Cicilia a hasi hopi trabou pa nos ta asina leu”, asina Kroon a splika. 

Mantenshon

Durante e anochi a menshoná ku e parti di mantenshon ta keda pa INDEBON i FFB. Hende no por para na waya pa wak wega den e stadion. Mester tin lugá pa sinta i esei ta bai sosodé. Ta regla di CONCACAF i mester kumpli kuné. 

Dia 10 di mart awor, ta hasi un práktika di prueba, kon tur kos ta bai ta fin pa luna. Mas o ménos 2000 hende por sinta den e stadion, momentu e ta kla pa e weganan ku ta bai tuma lugá. Dia 10 ta bai tin un wega di Inter Willemstad kontra e tim di Boneiru.