KRALENDIJK—Djaluna atardi Stinapa a a invitá prensa pa papia tokante e delaster evento di e proyekto di RESEMBID: Lac Pa Semper Final Event.

Ta trata di e proyekto ku ta hunga un ròl klave den engrandesé e resilensia di nos isla pa medio di restourashon di habitat, turismo sostenibel i mehorashon di kalidat di awa. E esfuersonan akí a mehorá e trabou di konservashon i ta yuda e rekursonan natural di Boneiru, na un manera mas responsabel. 

Na e okashon di e rueda di prensa, a presentá kòrtiku e rangernan i tim di Stinapa, e logronan di e gran proyekto. Roxanne Francisca di Stinapa a papia na e okashon, mustrando ku nan a hasi investigashon sientífiko den e área di lac. Nan a pone bòrchinan ku ta duna indikashon splikashon tokante piská, bestia i matanan den a área. 

Boto nobo

Banda di esaki nan a kumpra dos boto nobo ku ta yuda ku diferente trabou, entre otro pa kontrolá e área di Lac i pa momentu tin algu di urgensia, Stinapa por aktua rápido. E botonan ta bai yuda pa atendé mas mihó tambe ku e problema di sargasum, ku ta bai oumentá mas den nos área. Nos mester prepará, monitoriá e movementu di e yerba aki.