KRALENDIJK – Konseho di minister a disidí ku studiantenan Karibense ta haña promé ku nan yega Hulanda kaba un number di identifikashon úniko (BSN). Ta presentá e desishon pa aprobashon na Raad van State. Ku e number di identifikashon úniko ta mas fásil pa studiantenan pa regla nan  asuntunan ku gobièrnu i otro instanshanan ònlain. Asina nan no ta haña nan den pèrtá sin nodi. 

Ta e intenshon ku na momentu di hasi petishon pa finansiamentu di estudio via DUO ku studiantenan Karibense ta haña mésora un BSN. Ku un BSN studiantenan por regla ònlain tur asuntu ku gobièrnu i otro instansha kaminda ta rekerí un BSN. Por ehèmpel hasi petishon pa un DigiD, kompensashonnan i traha un sita ku e munisipio pa inskribí den e Basisregistratie Personen (BRP). 

Di e manera aki studiantenan por prepará nan mes mihó pa nan biahe pa Hulanda i regla nan asuntunan mas lihé despues di nan yegada. E desishon ta un promé stap. Despues ku el a drenta na vigor mester di tempu pa adaptá e sistemanan di DUO.

Pa studiantenan Karibense ku derecho riba finansiamentu di estudio

E kambio ta bai konta pa studiantenan prosedente di Boneiru, Saba i Sint Eustatius, Aruba, Kòrsou i Sint Maarten. Nan mester tin derecho riba finansiamentu di estudio i nan mester bai studia na Hulanda, pero no mester biba einan ainda. Un kondishon importante ta ku nan mester tin nashonalidat Hulandes. 

Studiantenan Karibense di MBO ku no tin 18 aña ainda tambe ta haña e BSN promé ku nan yega Hulanda. E derechi pa biaha ku nan ta risibí, konosí komo e produkto pa biaha pa studiantenan, tambe ta kai bou di finansiamentu di estudio.

Despues di e desishon aki tambe studiantenan Karibense ta obligá pa inskribí nan mes den e BRP di e munisipio Hulandes kaminda nan ta bai biba, despues ku nan yega. Ta inskribí nan den e BRP temporalmente komo no-residente.  E regla ta konta pa tur hende ku ta bai keda mas ku kuater luna Hulanda. E BSN ta keda méskos. 

Medidanan èkstra na kuminsamentu di estudio den 2023 

Pa studiantenan Karibense ku ta kuminsá na ougùstùs òf sèptèmber di e aña aki ku nan estudio na Hulanda no ta posibel pa implementá e kambio na tempu despues ku e drenta na vigor. Nan ta haña un BSN despues ku nan a inskribí den e BRP di e munisipio Hulandes kaminda nan ta bai biba. Gobièrnu di Reino ta bai hasi esfuerso pa den kasonan individual solushoná opstákulonan ku ta kondusí na retraso na momentu di inskripshon den e BRP pa studiantenan Karibense.