Bradenton -Den un wega hopi pèrtá kaminda Sur Korea a konektá tres hit i e ekipo di Reino Hulandes 2 hit i ámbos ekipo kompañá pa bon pitcheo, e ekipo Koreano ta sigurá su posishon den e final di e seis ekiponan, saliendo di porta grandi ku e anotashon di un pa nada.

Den un tempu un poko ménos kalor, e dos ekiponan, respektivamente Reino Hulandes i Sur Korea a subi e tereno na stadion Ed Smith pa enfrentá otro den e kampeonato mundial U-18 na Bradenton Florida. 

Ta konsiderá Sur Korea, igual ku USA komo e dos timnan mas fuerte den grupo A, den kua grupo e ekipo di Reino Hulandes tambe ta partisipá. Te promé ku e wega e ekipo di Reino Hulandes tabata kompartí e di dos lugá den e seri ku Sur Korea ku kada un dos partido ganá i un pèrdí. 

E pitcher Arubano Justin Morales di  e ekipo di Reino Hulandes a tira un tremendo partido, permitiendo den 5 inning solamente 3 hit. Un di e hitnan aki tabata den e di dos inning, despues di kua ela duna 2 base por bola konsekutivo. Ku basenan yen un deadball ta perkurá pa e úniko kareda di e partido pa Sur Korea.

Ku e derota aki, e ekipo di Reino Hulandes awe pa 12.30 lo enfrentá e ekipo di Sur Afrika. E kompromiso di e ekipo di Reino ta pa sali viktorioso i asina partisipá djaweps den e Super Round di e seis mihó ekiponan di e kampeonato.