Skirbí pa Marit Severijnse di Caribisch Netwerk i tradusí pa ABC online Media

“Mester kibra e tabú ku tin rondó di dunamentu di lechi na pechu na Boneiru”, e spesialista den e kaso aki Mariëlle Olaya Romero ta bisa. E ta ripará ku dunamentu di lechi di pechu no ta e norma mas i ku duna e yu pechu den públiko ta tabú. “Bo lo mester por duna bo yu pechu tur kaminda, pero tòg hendenan tin nan pensamentu riba esei.”

E luna aki ta pone atenshon mundialmente na duna yu pechu. Olaya Romero a organisá un evento pa pidi atenshon pa esaki i interkambiá eksperensianan. “Mas bieu bo yu bira, mas e hendenan tin algu di bisa”, e ta opservá a base di relatonan di mamanan na Boneiru.

Duna yu pechu i pòmp lechi na trabou ‘Tambe e lo ke mira ku hendenan muhé ta haña kompensashon na momentu di duna pechu i ku dunadónan di trabou ta informá nan trahadónan riba nan derechonan’. “Esaki ta inkluí por ehèmpel un espasio adekuá i tempu bou di ora di trabou pa pòmp lechi.” “Mi dunadó di trabou no a informámi nunka kiko ta mi derechonan enkuanto pòmp lechi i duna pechu”, Alicia Xuan-Krijgsma ta konta. “Danki Dios mi a siña na e kurso di embaraso ku mi tin derecho riba 25% di mi ora di trabou pa duna pechu i pòmp lechi te ora ku mi yu tin 9 luna. Mi hefe di servisio a stimulá esei, pero no tabatin e fasilidat pa pòmp lechi. Kore bai kas i bin bèk tambe a bira henter un kos i tabata kostami muchu tempu. P’esei mi mes mester tabata kreativo pa fasilitá mi mes den esaki”, Xuan-Krijgsma ta sigui bisa. “Un di mi koleganan a traha por ehèmpel un bòrchi  p’ami pa riba porta ku “mi ta pòmp lechi, no stroba” i nos a tapa e bentana”. Ilse tambe ta rekonosé esaki. “En realidat no tin sufisiente informashon disponibel. E no ta bon spliká. Mi dunadó di trabou por ehèmpel ta di habla Spañó, pues informashon tokante derechonan na trabou pa loke ta trata pòmp lechi òf duna pechu, lo mester ta disponibel tambe den mas idioma.”

“Wardando mi turno na lugá di pisa yu mi tabata duna mi yu pechu”, Dragana ta konta. “Ora ku tabata mi turno i ku mi a lanta kuné na mi pechu, a pidimi tòg pa tapa. Mi ta respetá esei, pero e tabata remarkabel si.”

Despues Dragana a haña kòmplimènt ku e tabata duna yu pechu ainda, e ta konta. “E ora ei mi a pensa: huh, en realidat esei ta normal tòg?”

Ilse tambe ta rekonosé esaki. “Nan a reakshoná un tiki asombrá ku mi ta duna pechu so. Pues no den kombinashon ku lechi na bòter.”

“E lugá di pisa yu por ta un tiki mas positivo tokante duna yu pechu i nan mester sa mas tokante di esaki”, un mama ku ta preferá di keda anónimo ‘pasobra Boneiru ta chikitu’, ta bisa. “Ainda ta bisa mamanan ku nan mester duna pechu kada tres ora i tin biaha mi ta tende ku nan ta deskonsehá pa duna pechu anochi. No ta bon konseho ètòl!”