KRALENDIJK – Fundashon Lesa i Skirbi Boneiru ta buskando mas ku 100 boluntario entusiasmá pa e Dia Nashonal di Lesa pa Skucha, ku e aña aki ta tuma lugá durante Siman di Buki pa Mucha riba 16 di novèmber di 9.00 te 9.30 di mainta. E evento lo tuma lugá simultáneamente na tur skol básiko di Rincon te Nikiboko.

Boluntarionan tin chèns di lesa pa skucha den e klas mei ora i nan tin mag di skohe nan mes for di kua buki nan ke lesa, tanten ku e ta apto pa e nivel di e alumnonan. Den grupo 1 te ku 4 lo lesa na Papiamentu, mientras ku den grupo 5 te ku 8 lo mantené Hulandes.

Pa esnan ku no tin eksperensia akinda ku lesa pa skucha, Fundashon Lesa i Skirbi Boneiru ta ofresé djabièrnè 10 di novèmber un tayer grátis “Lesa pa Skucha”. Eskritor i dosente Monica Clarenda lo duna tepnan durante e tayer aki kon ta e mihó manera pa fasiná e muchanan. 

Bo ke duna un kontribushon na e Dia Nashonal di Lesa pa Skucha na Boneiru? Registrá via [email protected] òf tuma kontakto ku Darly Janga i Paul Ruijs via tel. 599 782 4569.

Fundashon Lesa i Skirbi Boneiru, ku ta un inisiativa ku ta hasi esfuerso pa engrandesé abilidatnan di lesa i skirbi riba e isla, ta organisá atrobe e aña aki e Dia Nashonal di Lesa pa Skucha. Partisipashon na e evento aki  ta un oportunidat tremendo pa kontribuí na edukashon i plaser den lesamentu di e generashon mas hóben na Boneiru.