KRALENDIJK – E organisashon anual Ride for the Roses na Boneiru ta den ful suin. Djadumingu 2 di febrüari e organisadó Coen van Gennip ta spera minimal 800 te asta podisé 1000 partisipante na Parke Isidèl. “E registrashonnan ta kana e aña aki super bon. Hopi empresa ta partisipá i ta kumpra un kantidat grandi di teket. Ònlain tin kaba mas inskripshon ku aña pasá. Nos ta wak ku hopi espektativa e tres dianan di benta di teket,” Van Gennip ta bisa entusiasmá.

Segun Van Gennip tin un subida den e kantidat di partisipante kaba e aña aki: “Nos tin awor aki 100 inskripshon kaba mas tantu ku aña pasá. I esei mientras ku inskripshon ta sigui ainda te djasabra anochi.” Na 2024 tabatin 800 partisipante, pero e espektativa ta ku posiblemente ta surpasá e kantidat aki e aña aki. “Den pasado nos tabatin asta 1000 partisipante, pues nos ta mira ku e interes ta grandi.”

Loke e aña aki ta diferente ta e variashon di aktividat. Partisipantenan no por solamente kore baiskel, kana i/òf landa. Tin awor tambe e posibilidat pa kore. Por skohe entre diferente distansha i ta posibel pa kombiná mas aktividat. Van Gennip ta enfatisá ku e sitio nobo den e parke, ku ta disponibel pa e evento e sinku añanan benidero, tin hopi bentaha: “Na 2017 nos tabatin ainda un lugá di stashoná outo bashí, pero awor nos tin un bunita parke públiko ku hopi espasio i bon fasilidat, un mehorashon enorme.”

Durabilidat i siguridat

Van Gennip ta splika ku tin atenshon spesial pa durabilidat: “Nos no tin plèstik ku ta uza un biaha so riba e ruta. Kada ken mester bini ku su propio ‘bidon’, pero nos ta pèrkurá si pa sufisiente punto di awa i tin kùpnan ku por sigui uza tambe kantu di e ruta. Esei ta pas den nos enfoke riba medio ambiente.”

Pa loke ta trata siguridat tin konsulta estrecho ku Krus Kòrá, KPCN (Polis), i otro organisashonnan lokal manera Scouting, Stinapa i Jong Bonaire ku ta yuda ku organisashon di e aktividatnan di landamentu. “E ruta pa kore no ta kompletamente será, pero nos tin kolaboradónan na e krusadanan drùk. Nos ta hasi tur nos posibel pa garantisá siguridat di un i tur,” segun Van Gennip.

E programa di Ride for the Roses 2025.

T-shirt i rekoudashon di fondo

E partisipantenan por buska nan t-shirt pa e evento riba djaweps i djabièrnè entre 5’or i 7’or di atardi. Van Gennip ta enfatisá ku e T-shirtnan ta optenibel te na e último dia di inskripshon ku ta djasabra anochi. “Aña pasá nos a rekoudá 60.000 dòler pa kombatimentu di kanser i nos ta spera di optené e mesun resultado e aña aki,” Van Gennip ta bisa. Banda di e partisipashon tin tambe e posibilidat pa hasi donashon via e website, pa esnan ku no por partisipá. 

Evento pa un i tur

E evento no ta pa partisipantenan so. Van Gennip ta konta ku tin hopi kos di hasi pa bishitantenan, maske nan no ta partisipá na e aktividatnan deportivo. “Nos tin seshonnan di yoga den e parke, tin kioskonan, músika i otro aktividat. E ta bira di bèrdat un dia pa un i tur.” Gezaghebber di Boneiru tambe lo tene un diskurso pa habri e evento ofisialmente. Esei ta sosodé mitar di shete di mainta.

Sosten na fundashonnan lokal

Manera semper e evento tin un bon kousa: e fondo di sosten pa kombatimentu di kanser na Boneiru. “Nos ta traha huntu ku Fondo di Kanser Boneiru, Hospice Kas Flamboyan i e aña aki nos a añadí tambe e Fondo Ambulans Deseo Boneiru,” Van Gennip ta konta.

Informashon práktiko

Partisipantenan por buska nan T-shirt djaweps i djabièrnè. No tin problema pa parker, tin sufisiente espasio pa stashoná outo rondó di e parke. I pa esun ku ta duda pa partisipá: “No tin kompetensia, no tin promé, ni di dos, ni di tres lugá, nos ta un fundashon i ta bai pa e bon kousa.