KRALENDIJK – Boneiru tin un talento nobo riba kancha di tènis: Amy Damascus. Bo por haña e hóben di djeskuater aña, ku a nase i lanta riba e isla, tur dia riba kancha di tènis. Su soño? Bira asina bon ku e ta haña un beka i por bai studia den Estadonan Uní di Merka.

Amy a kuminsá praktiká tènis for di edat hóben i for di e tempu ei el a kubri un trayekto impreshonante. “Mi ta hunga kasi djes aña kaba,” e ta konta entusiasmá. “Mi padrino tabata coach na un universidat Merikano i esei a inspirámi pa kuminsá.”

Den e añanan ku a transkurí Amy a representá Boneiru na torneonan internashonal na entre otro Kòrsou, Aruba, Repúblika Dominicana, Trinidad i Estadonan Uní di Merka. E eksperensianan aki no a hasi’é mas fuerte komo hungadó, pero tambe a mustr’é kiko mester pa presta riba nivel estelar.

Treinennan di djes ora pa siman

Manera ku kada prestashon estelar Amy tambe konosé opstákulo riba su kaminda.  Aktualmente e ta lucha ku un leshon na su pòls, lokual ta limitá su skema di treinen. “Awor aki mi ta trein solamente sinku ora pa siman enbes di djesun,” e ta splika. “Pero manera mi ta fet atrobe, mi ta bai tur ku tin ku mi entrenadó Jevon May.

Apesar di e kontratiempo aki Amy ta keda desidido. Su  meta definitivo ta un beka na un universidat Merikano, ku podisé asta un karera di tènis profeshonal komo perspektiva.

Balansa entre skol i deporte

Banda di su ambishonnan deportivo Amy mester sigui ku su tareanan di skol tambe, algu ku no ta fásil tur ora. “Ta fastioso pa haña un balanse,” e ta atmití. “Spesialmente ora mi mester traha mi pruebanan despues di un torneo internashonal.” Apesar di su bon sifranan, e lo ke haña mas sosten di skol, di moda ku e por konsentrá mihó riba tur dos tereno. Remarkabel ta ku bont di tènis Hulandes (KNLTB) no a tuma kontakto ainda pa sostené e talento Boneriano. Ku e sosten èkstra aki lo por yuda sostené Amy su karera.

Su tata Francis ta enfatisá ku ta importante pa Amy hasi su propio eskohonan: “Tabatin un temporada kaminda el a kuminsá haña tènis ménos agradabel. Nos a diskutí e tempu ei tur opshon kuné i a bisa Amy ku nos ta sostené kada eskoho ku e hasi. Si bo sigui, nos ta yudabo. Si bo stòp i ke hasi algu otro, tambe nos ta yudabo. Finalmente ta keda su desishon, pero nos ta para tras di su eskoho, si ta trata por ehèmpel gastunan di pasashi of gastunan di estadia.”

Un soño ku ta bai mas ayá ku Boneiru

Amy su motivashon ta grandi. “Tènis ta yudami relahá,” e ta bisa. “Mi ta sali for di mi zona di komodidat i ta gosa di e treinennan. Mi no ta sinti mi apsolutamente obligá pa hasi esaki.”

I su ambishonnan ta bai mas leu ku solamente un beka pa studia. “Aki djes aña mi ta spera ku Boneiru tin su promé kampeon di Wimbledon,” e ta bisa ku un sonrisa riba su kara. “Lo ta fantástiko si ta ami ta e persona ei, pero di tur manera mi ke kontribui na kresementu di tènis na Boneiru.” 

Plannan pa futuro i retonan

Pa alkaná su metanan, mester sosodé hopi ainda. Deporte di tènis na Boneiru tin fasilidatnan limitá i sosten finansiero ta krusial. “Mester di spònsernan di bèrdat,” Amy ta enfatisá. “Mi tin gana di hunga kontra kontrinkantenan mas fuerte den torneonan internashonal. Tambe mi ta buska aki na Boneiru ayudo pa fisioterápia. E sosten aki lo por sigui yudami den futuro.”

Dilemanan den hasi eskoho

E no sa ainda si finalmente e lo bai hunga tènis profeshonal. “Loke mi sa si ta ku mi ke buska mas tantu puntonan internashonal posibel (ITF) i ke gana un beka. Ku e beka aki mi por bai studia na Merka den futuro,” e ta bisa desidido. “E último lunanan mi ta haña mas i mas e pregunta kiko mi lo bai studia e ora ei. Esei di bèrdat mi no sa ainda. Mi promé dilema ta na luna di mart. E ora ei mi mester skohe na skol kua pakete mi ke tuma. Despues mi ta sigui wak.”

Pa e aña aki Amy tin plannan ambisioso kaba. E ta spera di partisipá na un kampamentu di tènis na Miami i ta wak torneonan nobo den region. “Ta dependé natural kon lihé mi pòls ta rekuperá, pero mi ta keda positivo,” e ta tèrminá optimista.