KRALENDIJK – Tourism Corporation Boneiru (TCB) a finalisá su Plan di Akshon 2024, siguiendo e dokumento di direkshon estratégiko poní den e Masterplan di Turismo 2017 i e plan di akshon di tres aña pa 2023.

E plan nobo tin komo meta pa avansá un industria di turismo sostenibel i hustu na Boneiru, rekonsosiente e kontribushon sigifikante di turismo na e Produkto Interno Bruto (PIB) i empleo di e isla. E Plan di Akshon 2024 ta enfasisá riba e tema ‘Kuido di Herensia, Kultura, Naturalesa, i Turismo’. E ta inkluí strategianan pa eduká i inspirá bishitantenan, ehekutá turismo basá riba komunidat, reposishoná Boneiru komo un destinashon di biahe sostenibel, diversifiká e merkado, oumentá gastunan di turismo, atraé e públiko korekto, i mehorá nivel di servisio.

E plan tambe ta marka un kambio den enfoke di TCB for di merkadeo tradishonal pa maneho i merkadeo integrá, enfatisando protekshon ambiental, herensia kultural, i bienestar di komunidat.

Direktor di TCB, Miles Mercera, a bisa ku e organisashon no por logra su meta solamente, pero ta konta ku diferente parti interesá. “E tim di TCB ta dediká na implementá e plan aki i reforsá e posishon di Boneiru den biahe sostenibel”.

Plan di akshon

E promé kopia di e Plan di Akshon 2024 a ser entregá na Komisario di Asuntunan Ekonómiko i Turismo, Clark Abraham, i partnernan manera Asosiashon di Hotèl i Turismo di Boneiru (BONHATA), STINAPA Boneiru i aeropuerto Flamingo.