KRALENDIJK – Djasabra último TCB & Friends Culture Group Bonaire a presentá su trahe di simadan ku nan lo bai marcha kuné den kayanan di Rincon dia 30 di aprel 2023 i tambe durante e marcha na Playa dediká na Chana i Doei dia 1 di mei 2023.

Tabata un anochi yená ku goso i alegria pa e miembronan ku tabata presente den un tremendo ambiente ameno ku JC & Friends, e banda ofisial di TCB & friends. E evento a tuma lugá riba e sitio di stashoná outo di Tourism Corporation Bonaire (TCB).

Tabatin un tremendo show di baile folklor, na unda  e grupo Bonaire Folkloric Dancers a presentá e trahe na e miembronan presente.

E grupo TCB & Friends ta un proyekto di TCB ku ta kai bòu di direkshon di Angelo Domacasse i ta konsistí di en total 180 miembro.

E aña aki tema di e trahe ta “It’s in our Nature”. E trahe ta representá e flamingo di Boneiru ku nos ta mira tambe den ‘branding’ di TCB ku ta e spònser prinsipal di e grupo.

E trahe ta ilustrá nos manera di pensa i papia, nos komportashon, nos manera di ekspresá, e ta inspirá nos pa stima nos kultura i ta solidario ku otro pa asina nos por kompartí nos balornan i nos  kustumbernan i normanan.

E lensu ta representá tur e efektonan positivo ku ta lora rònt di nos isla Boneiru i nos kultura.

Koló blanku: pas i libertat. Koló hel: solo i flornan di Kibrahacha ku ta floria un bes pa aña so.

E koló ros ta representá e flamingo ku tambe tin den e trahe. E flamingo ta e diva eksklusivo, elegante manera e so por, loke ta den nos naturalesa.

Monique Winklaar a diseñá e trahe.