KRALENDIJK – Fundashon Tienda pa Konsumidó Boneriano (FTPKB) ta mira pastechi kasi bashí komo prueba dje echo ku e fenómeno shrinkflation a hasi su entrada na Boneiru tambe.

FTPKB resientemente a risibí un keho tokante un pastechi ku tabata primeramente yená ku airu, na lugá di e ingredientenan normal manera karni, keshi òf tuna, pa un preis di 2 dòler ku 50 sèn. 

Esaki, segun e tienda pa konsumidó ta un ehèmpel perfekto di loke ta wòrdu yamá shrinkflation, kaminda ku ta baha kantidat òf kalidat di produkto ta baha mientras ku e preis ta keda meskos òf ta asta subi. 

FTPKB ta enfatisá ku konsumidónan mester ta atento riba e prátika aki. “Ta importante pa kompará produkto, hasi pregunta na e bendedó i indiká keho si e kalidat ta baha. Dor di mèldu e prátika inhusto aki, e konsumidó por kontribuí na mas transparensia i honestidat den merkado.”

Mèldu keho

E defensor di interésnan di konsumidó pa e motibu aki ta hasi un yamada pa mèldu kehonan riba nan website, pa otro kumpradónan ta na altura i por ta atento riba e tipo di prátikanan aki. Alabes, registrando kehonan di e tipo aki, e tienda pa konsumidó por yuda atendé ku esakinan.