BRADENTON –Ayera, djaluna 12 di sèptèmber, e ekipo di Ulanda a enfrentá e ekipo di Brasil. Un wega kaminda Brasil a sali pa buska un viktoria, hinkando den promé inning dos kareda.

Ulanda a realisá ku ta kos serio tin i ta dal bèk ku un homerun di Darnell Collins den e di tres inning ku un koredor na base pa asina Ulanda empatá e wega. Ku e skor dos pa dos den e di kuater inning Ulanda ta hinka un kareda mas riba un flai di sakrifisio di Gedionne Marlin  poniendo e skor na tres dos na fabor di Ulanda. Den e mesun inning Ulanda ta anotá un kareda mas riba un balk di e pitcher brasilero. 

Ku e skor kuater pa dos, Brasil ta menasá ku basenan yen, pero e pitcher Ulandes ta sabi di dominá e situashon i ta sali for di e inning sin ku Brasil a anotá kareda. Den di sinku inning Ulanda ta anotá un kareda mas, hasiendo e wega sinku pa dos na nan fabor. Den e último oportunidat di Brasil den kabes di di shete inning, e ekipo di sur amerika ta menasá un biaha mas yenando e basenan, pero tabata momentu pa yama Stein van der Schaaf for di den bulpèn ku a bin paga e kandela brasilero.E skor final ta sinku pa dos na fabor di Ulanda. 

Ku dos wega ganá i un pèrdí awe Ulanda lo enfrentá e ekipo fuerte di Korea, miéntras ku djarason Ulanda lo hunga kontra Sur-Afrika, kual ta e wega ku a keda suspendé djadumingo pa motibu di awaseru fuerte.

Awor Ulanda su kompromiso ta pa gana un di e partidonan aki pa asina e por partisipá den e promé seis ekiponan ku ta klasifiká pa Super Round riba djaweps, djabièrnè i djasabra, miéntras ku djadumingo 18 di sèptèmber lo hunga e final di e kampeonato.