Bradenton – E torneo mundial di beisbòl U-18 a yega na su fin ayera djadumingo 18 di sèptèmber ku USA birando kampeon despues di a destroná Chinese Taipei den e último wega di e kampeonato ku e skor di 5-1. Hapon a keda na di tres lugá ku medaya di bròns miéntras ku e ekipo di Reino Hulandes a terminá na di 5 lugá, e puesto mas haltu ku e ekipo a logra yega den e torneo mundial aki.

Djabièrnè e ekipo di Reino Hulandes mester a mira su oportunidat pa por klasifiká i hunga pa di tres o di kuater lugá disparsé ora ku den kuminsamentu di e di seis inning, awaseru a para e wega ku e ekipo di Chinese Tapei dilanti ku e skor di un pa nada ku un solo hit.

E organisashon a warda pa 90 minüt pa wak ku e awaseru lo por a para i asina duna kontinuashon na e wega. Sinembargo esaki no a tuma lugá i ademas e fèlt tabata den tal estado ku lo no por a kontinuá ku e partido.

Mester trese dilanti ku e ekipo di Reino Hulandes a duna bon bataya durante henter e kampeonato i mester a enfrentá 11 ekipo di nivel internashonal. E hóbennan a duna tur loke nan tin i a kue hopi eksperensha pa loke ta beisbòl i kon ta praktiká esaki tantu na Merka komo den e paisnan asiátiko. Den e parti defensivo e ekipo tabata hopi fuerte, miéntras ku den e parti ofensiva si nan no a demonstrá nan fortalesa. Mester bisa ku na e skornan di e weganan pèrdi por a nota ku e ekipo di Reino Hulandes a duna bon bataya.

Ku USA saliendo kampeon di e torneo, lo mester warda otro aña pa e siguiente kampeonato mundial U-18. Na unda esaki lo tuma lugá no ta konosí ainda. Echo ta si ku e ekipo di Reino Hulandes huntu ku Spaña lo t’ei den representashon di paisnan Oropeo.

Un pabien na e ekipo di Reino Hulandes i nos ta spera ku nan lo sabi di  pone den praktiká tur e eksperensha i konosementu ku nan a haña durante e torneo aki. Speshalmente ta bon pa nan konsentrá riba nan bateo i un bon staf di pitcheo. Rekomendabel ta tambe pa nan bin ku mas strategia pa embasá koredónan pa asina krea mas oportunidat pa anotá kareda.