KRALENDIJK – Esnan ku sa hasi nan kompras regularmente na Kaya Industria lo por a nota ku un tienda nobo ku a habri su portanan den e dianan tras di lomba. Ta trata di Canarbo, ku ta deskribí su mes komo un Epicurian Market.

Ounkue e tienda ta nobo, e kompania riba us mes no ta nobo. Canarbo ya pa 10 aña ta suministrando produktonan na vários restorant. Awor, a pone e siguiente stap, ku un tienda na unda klientenan individual por bin hasi nan kompra. E duo tras di Canarbo ta e Boneriana Indira Charles, ku a lanta e negoshi huntu ku su pareha Kanadiense Brian Battha. 

“Nos tabata suministrá diferente kliente pa hopi aña kaba, pero semper nos tabata mas patras riba tereno, asina ku mayoria hende no tabatin niun idea di nos eksistensia,” Battha ta splika. Sinembargo, e pareha a mira oportunidat den un merkado den kua kada biaha tin kasi tur tienda i supermerkado ta bende e mesun produktonan. Canarbo sinembargo ta ofresé produktonan ku no por haña niun otro lugá riba e isla. Ta trata entre otro di un variedat grandi den produktonan di laman, karni di mihó kalidat, keshi spesial di diferente pais, ingrediente spesial òf difísil di hanña, un sekhon Végano amplio i un selekshon tremendo di nechi di e empresa Nuthouse na Kòrsou.

Orguyoso

Battha i Charles ta mustra hopi orguyoso di nan tienda nobo, ku un interior ku ta mustra mesun luhoso ku e produktonan mes. “Ami komo persona ku a nase i lanta na e isla aki, sigur ta sinti mi orguyoso di ta parti di e negoshi aki, huntu ku Brian. Awendia tin mas i mas negoshante ku ta bin djafó pa hasi negoshi na Boneiru. Pero ami komo hende lokal ta un di esnan tras di e negoshi aki, ku a resultá eksitoso i mi ta sintimi proud di esei”, Charles a bisa.

Battha i Charles ta kontentu ku nan a logra habri promé ku Pasku, ounke no tur kos ta kompletamente kla ainda. “Por ehèmpel nos ta wardando riba e bòrchi ku nos mòmber ariba, pero manera bo mes por mira, e no tei ainda”. Tambe tin produkto ku falta ainda den e tienda, ounke mirando e variedat di produkto ku tin, lo no bisa esaki. “Un palèt ku produktonan ku nos a pidi no a wòrdu mandá mes, kaminda ku un otro palèt ku nos produktonan a bai un isla robes,” Charles a splika. E sa di ekperensha ku spesialmente den temporada di Pasku, hopi kos no ta kana bon pa loke ta trata transporte for di eksterior. 

Pòtret

Battha i Charles mes no ke sali riba pòtret. “No, mi no gusta sali riba pòtret mes” Charles ta bisa ku un smail riba su kara. “E tienda ta loke ta importante, no nos.”

E palabra “epicurian” ta un término ku ta wòrdu usa, entre otro, pa deskribí un persona ku ta disfrutá di e kosnan bon di bida, speshalmente riba tereno kulinario.