KRALENDIJK – E simposio di salú ‘Nos t’ei den kuido’ ku a tene na Plaza Resort Bonaire riba djarason, a boga pa un kuido di salú inklusivo na e isla. Organisá pa Fundashon EQ komo parti di Pride Bonaire, e evento a trata e retonan i nesesidatnan di komunidat LGBTQI+.

E simposio tabata tin komo meta krea konsiensia entre profesionals di salú i ofresé hèrmènt práktiko pa satisfasé e nesesidatnan diverso di salú di komunidat LGBTQI+. Temanan kritiko  tabata inkluí inklusividat, rèspèt, redukshon di stigma, i mehorashon di igualdat i aksesibilidat di kuido.

Punto importante

Oradónan  a kompartí nan eksperensia, i sesionnan interaktivo a permití profesionals di salú interkambiá eksperensianan i bon práktikanan. E simposio a marká un punto importante den realisashon di kuido di salú inklusivo na Bonaire.

Fundashon EQ i organisashonnan partisipante ta komprometé pa sigui fomentá kuido inklusivo i impulsa kambio positivo.