WILLEMSTAD – Den un diskurso emoshonal i históriko sekretario di estado Alexandra van Huffelen a ekspresá e dekreto ku Estado Hulandes a rehabilitá Tula kuné. Esei a sosodé den e edifisio di PWFC pa motibu di e awaseru inesperá.  Originalmente e rehabilitashon lo a tuma lugá un dia promé na Parke di Lucha pa Libertat kant’i laman, pero e tempu a trese un paro den esei. Awaseru torensial i ráfaganan di bientu pisá a pone ku e organisashon mester a kanselá e evento.

Van Huffelen a papia di e importansia di enfrentá e historia penoso di Hulanda. El a enfatisá ku Estado Hulandes a purba di bora  e historia di hopi Yu di Kòrsou, entre nan Tula, un echo ku e ta arepentí i tin bergwensa p’e.

El a sita e palabran poétiko di Tula tokante libertat i igualdat, ku ta pone hende pensa riba e obranan di eskritornan pretu influyente di añana ’60 i ’70.

Horibel 

E sekretario di estado a papia abiertamente di e krueldatnan ku Estado Hulandes a kometé kontra Tula i su kompañeronan. Huntu ku Tula a rekordá tambe e echonan baliente di Bazjan Carpata, Pedro Wacao i Louis Mercier.

“Tula a enfrentá un Estado, un poder kolonial. Un strukturo monstruoso di ehersito- i flotanan komersial. Un sistema kriminal, kaminda esun hende ta hasi e otro un produkto komersial”, segun Van Huffelen.

Segun e sekretario di estado a lanta e sistema pa akumulá rikesa i pa ta dispuesto pa uza  tur medio disponibel pa defendé e rikesa ei. 

Violensia 

E tempu ei Estado Hulandes a kontestá Tula su yamada pa libertat, igualdat i fraternidat ku violensia, un echo ku Van Huffelen ta lamentá profundamente. E ta asentuá ku Tula su resistensia i yamada pa hustisia ta klásiko i universal.

Fin di aña pasá promé minister Mark Rutte a pidi diskulpa pa e pasado di sklabitut di Hulanda. Rei Willem-Alexander a konfirmá esei un biaha mas riba 1 di yüli di e aña aki. E rehabilitashon ofisial di Tula, ku a anunsiá na dezèmber, ta konfirmá awor ku e diskurso di e sekretario di estado.

Influensia 

Mientras e rehabilitashon di Tula ta un stap importante den rekonosementu di e pasado di sklabitut, Van Huffelen ta asentuá tambe e influensia permanente di e pasado ei riba e sosiedat di awendia i e nesesidat pa sigui ku diálogo i rekonosementu.

Muchu tempu largu hóbennan na Kòrsou a siña di e bida na otro banda di oséano, pero no di e aktonan heroiko di nan propio antepasadonan. “Hulanda ke kibra ku esei”, segun e sekretario di estado.

“Nos mester i ke pone un fin na transmití trouma pa siguiente generashonnan.” Aki ta pas segun Van Huffelen: hasi investigashon posibel, sigui konta storianan, bukinan di skol di propio suela i kultivá kultura i tradishon.