Skibí pa Marius Bremmer, Tradusí pa ABC Online Media

E haf di Kralendijk a bira muchu chikitu. Mas i mas  i barkunan krusero mas grandi ta konkurí ku e provedónan marítimo di e isla di flamingo. Ta warda awor riba un haf nobo, pero oposishon ta kontra. Kapitan di haf Günther Flanegin: “Aktualmente mi ta hasi un baile logístiko ku barkunan ……”

Originalmente Flanegin (47 aña) ta bini di Aruba i tabata siña bon kaba komo mucha. Ku un master na universidat di Erasmus i un karera na kompania di nabegashon Heerma el a bira kapitan di haf na Boneiru. E gusta konta kon el a resultá den mundu marítimo, kiko e problemanan i eventual solushonnan pa Boneiru ta i kiko su ofisina di haf – ku muchu tiki hende – ta responsabel pe.

Akumulashon di edukashon i formashon 

“Despues di MAVO mi a hasi ingenieria na MTS. Komo Verkenner nos tabata nabegá riba laman i mi a siña traha ku kòmpas: despues di esei konstrukshon di barku a atraé mi mas ku konstruí kas!” Komo studiante el a kué djòp di fakansi riba laman: “Mi tabata traha riba toubut den haf di Aruba, pero tambe riba mega yatenan  na Merka.” Flanegin por a bai Universidat di New Orleans pa un estudio di konstrukshon di barku. Orkan ‘Katrina’ (2005) a trese un final aprupto na esaki. “Mi tabata buska trabou na Hulanda komo naval architect, pero ora esei no a logra mi a skohe pa e estudio Maritime Engineering na Fakultat InHolland.” E siguiente stap tabata un master den Maritieme Economie & Logistiek na Universidat Erasmus di Rotterdam. Despues for di Hulanda Flanegin a traha na diferente empresa marítimo, manera na plataformanan di produkshon riba laman pa produkshon di petroli i gas. “E ora ei ya kaba  a lanta un tiki e idea di haf: tur kos mester keda drif i keda traha.”

Kada bes mas drùk 

Pa kasualidat Flanegin a tende ku e posishon di kapitan di haf na Boneiru a bira vakante: “Hopi personal lokal, serka di mi isla natal i ku un idioma i kultura similar. Tambe un kombinashon di ekonomia, téknika i trabounan marítimo!” Sinembargo ya ta shete aña kaba ku e ta purba pa komprondé Boneiru. “Tur hende ke pa bo ta na nan banda, mi ta mei mei di e área di tenshon entre e stakeholdernan riba e isla, dentro di reino i riba tereno internashonal.”

Su promé proyekto tabata renobá i alargá Pir di Suit den haf di Kralendijk. “Na momento di kambio bo ta topa ku resistensia, pero nos a solushon’é huntu si! Awor tin un pir moderno, fortifiká ku fiber i beton spesial, ku un kapa di asfalt ariba. Ku tiki mantenshon esaki por bai djes pa binti aña atrobe.”

E haf aktual por atendé karga pa 13.000 – 15.000 habitante, pero mientrastantu esei ta kasi 25.000 kaba. Mester bini mas fasilidat pa karga. “Tin un kantidat kresiente di kònteiner ku ta pone riba chasis for di barkunan roro pa transportá ku trùk, mas i mas barku grandi ta pone kònteinernan riba chasis ku nan propio kran, mas barku ta depositá bultonan den trùk i mas i mas barku ta bin baha merkansia na pida pida. Tambe Marina Real ta mara akinan.”

Haf nobo 

Ta buska e solushon pa un haf nobo ku un kran movibel chikitu i tambe lugá pa stashoná kònteiner. Un Maatschappelijke Kosten Baten Analyse (MKBA) (análisis sosial di gastu i benefisio) ta dirigí riba dos posibel sitio: e bario di Hato i BOPEC. E último ei, e anterior sitio pa almasená i transbordá petroli, ta muchu leu i ta eksigí hopi invershon den infrastruktura. Flanegin: “Pensa riba konstrukshon di kibraola i kamindanan nobo pa bai Playa.” Hato ta mas sentral i ta mas barata komo sitio, e gastunan di transporte ta mas abou. “Bo tin un sentro di distribushon serka, tin ménos transporte di kònteiner riba kaya (‘ekológikamente sano’) i e ta kosta ménos ora di trabou. Pero bo ta mei mei di hotèl- i turistanan si.” Flanegin ta mir’é komo un reto pa inová, pa pensa out of the box: “Podisé haf por haña un funshon sosial tambe?  Bo por stòp e aktividatnan komersial di 8’or di anochi te 8’or di manita, e no ta bira nunka un haf 24/7.”

Medio ambiente

Riba e isla ta opon’é kontra un haf na Hato pa motibu di e mundu bou di awa Boneriano partikular, posibel oumento di molèster di zonido, imáhen di e área ku ta kambia, mas tráfiko i stòf. “Tur ta aspektonan ku mester hinka den un Milieu-effectraportage (MER) (un raportahe di efektonan riba medio ambiente), kapitan di haf ta bisa. “E resultado neto di e konklushon mester ta: nos ta hasi’é òf nos no ta hasi’é. E ta fasinante pa traha di tal forma ku nos tin e públiko na nos banda i ku tur hende ta probechá di dje!” Podisé mester di tres aña pa e MER, “pero si mi pensa super positivo lo mi por pone e promé skòp den tera kaba na aña 2025.” I si ta ‘nò’? “Nos mester sigui si! Nos lo mester atendé ku Pir di Nort, probablemente lo mester añadí pirnan pa barkunan mas chikitu òf pa fèrinan.”

Turismo krusero

Último añanan mas i mas barku krusero grandi ta bini e isla di flamingo. Flanegin ta ilustrá: “Den mundu marítimo nos ta bisa: mas barku ta mas entrada. Pero e reto ta pa haña un balansa entre e kompania di haf i loke ta mihó pa komunidat. Komo kapitan di haf mi ta favoresé mas fleksibilidat, no balia ku ún solo sosio pero un baile logístiko ku mas barku. Dos barku krusero por mara fásil pa dia, basta ku plania sufisiente dia liber pa siman pa merkado marítimo ku mester trese karga pa e isla.” 

Tambe ta dependé di e kapasidat di e barkunan, e ta bisa: “Awendia tin mas barku ku 4000 – 6000 pasahero, dos barku asina riba un dia ta muchu hopi pa Boneiru, Kralendijk i sobrá di e isla no por wanta esaki. Ta un reto pa haña un bon balanse. Finalmente ta gobièrnu insular ta disidí kua banda tin ku skohe. Ami ta kapitan di haf i mi mester simplemente ehekutá e maneho.”

Profeshonalisá

Organisashon di haf mester sigui profeshonalisá, Flanegin ta haña. “Tin konsenso ku e haf ta muchu burokrátiko. Nos mes tambe ta atendé ku kompanianan: nos klientenan. Segun mi bo por atendé e problemanan di awor mihó i mas sistemátiko. E mester bira mes efisiente ku na Rotterdam òf na Kòrsou, pero e ora ei si na nivel Boneriano. Preferibel ku un par di profeshonal Boneriano èkstra aserka. Tin ekspertisio, Bonerianonan ta hendenan di laman. Esaki tambe ta gobièrnu insular tin ku atendé.” 

Flanegin ta ilustrá un bista di kiko asina e ofisina di haf ta enkargá kuné awor: “Apenas por dil ku e situashon. Di e kuater kuponan di trabou na ofisina dos ta vakante. Tin dos lots senior i un lots regular. Nos tin un barku di lots kompletamente revisá ku un tripulashon di seis persona, pasobra nos mester ta prepará 24/7. Tambe e ofisina di haf ta ofresé servisio di toubot den haf. Na tur momento tin un toubot kla den haf, si mester di un di dos e ta nabegá yega lihé for di Kòrsou.”

Tambe e organisashon di haf ta manehá e kuater faronan i e buinan den laman ganchu di Boneiru. “Nos ta pèrkurá pa e mantenshon di e faronan mes, Rijkswaterstaat di Hulanda i Alphatron Marine Carribean na Kòrsou ta pèrkurá pa e teknologia i e iluminashon den e faronan i e buinan.”

Tambe e kapitan di haf ta e persona di kontakto na momento di desaster i na momento di Search & Rescue. “Den kaso di emergensia riba laman Wardakosta di reino ta tuma e enkargo di nos over. Den kaso di un desaster di naturalesa e kompanianan di toubot ku a hür ta drenta den akshon. Den kaso di desaster Rijkswaterstaat di Hulanda tin material na Boneiru, manera pantaya di zeta.”

“Ta drùk-drùk-drùk i tur hende ta pidi pa mas-mas-mas. Pero Dios sa aki un par di aña nos tin un bunita haf nobo aserka!”

“Te aki”, Günther Flanegin su kara ta radia di alegria, “Mi tin un siguiente sita, mi a biba hopi aña na Hulanda, mi gusta yega na tempu ….