KRALENDIJK – Riba djadumingu 8 di dezèmber ta tuma lugá un akshon spesial kontra polushon di plèstik na Boneiru. Diferente organisashon manera Kooyman, Fun Miles, Fuse, Miles4Plastic i e Grupo HR, ta uni forsa pa e promé kampaña di #kombatí polushon di plèstik riba e isla. E meta: un Boneiru mas limpi i mas konsientisashon pa e importansia di resiklahe.

E akshon ta enkurashá habitantenan pa kolektá artíkulonan di plèstik i aluminio manera ALU, PET, HDPE i PP. Riba 8 di dezèmber entre 9’or i 12’or por entregá e materialnan aki na Kooyman. Pa kada 50 item ku a entregá e partisipantenan ta haña un chèns pa gana preis. Banda di bale i aparato por gana tambe un preis di sorpresa grandi.

Boluntarionan entusiasmá manera empleadonan di e organisashonnan embolbí ta karga e kampaña. Huntu nan ta spera di no solamente redusí polushon di plèstik, pero tambe hasi habitantenan mas konsiente di nan uzo diario di plèstik.

E kampaña di #kombati polushon di plèstik ta enfatisá ku resiklahe ta solamente un parti di e solushon. E redukshon di uzo di plèstik ta mésun importante. Ku e akshon aki nan ta spera di pone un stap den e direkshon di un Boneiru mas limpi i duradero.

Ta invitá habitantenan pa partisipá i kontribuí asina na un medio ambiente mihó.