KRALENDIJK- Sindikalista Norwin (Nòchi) Willem pa medio di su kuenta di Facebook a hasi pregunta pa loke ta trata e proyekto di sentro di servisio multi-funshonal pa siudadano den edifisio di LTS bieu, ku pa kasi un aña ta kompletamente pará. 

Ta trata di un proyekto ku a kuminsá bou di gobièrnu di UPB ku MPB. Sinembargo, dia ku kolehio ehekutivo aktual a tuma ofer, a para e proyekto, inisialmente temporalmente. Segun diputado Clark Abraham a splika na e momentu ei, tabata tin un situashon kaminda e proyekto lo a sali muchu mas karu ku a presupuestá. Alabes, segun Abraham a bisa, no a reservá sèn pa kaba ku e proyekto.

Loke ta hasi hinter e situashon aun mas interesante, i te asta pikante, ta ku e aktual gezaghèber di Boneiru, John Soliano, tabata enkargá ku ehekushon di e proyekto. A pesar ku supuestamente a surpasá e prosupuesto, tòg e mesun gobièrnu di PDB, M21 i Vrolijk a nombra Soliano komo direktor di e direktorado di B & O, pa despues bira esaki bira gezaghèber nobo di Entidat Públiko Boneiru (EPB).

Pregunta

Willem a hasi diferente pregunta, riba kual e lo ke haña un kontesta. E promé pregunta di Willem ta kuantu e proyekto a kosta. Na di dos lugá Willem ke sa dikon e proyekto aktualmente ta pará. Na di tres lugá Willem ker sa si lo bai sigui ku e proyekto, sí óf nò, i na di kuater lugá Willem ke sa ken ta responsabel pa e situashon ku a surgi. 

“No ta akseptabel ku ni ta distruí miones na kapital di plaka di belasting ni ku ta regalá miones na un kompani anto niungun hende ta responsabilisá. A yega ora pa haña kontesta riba e pregunta ken ta tapa pa ken”, segun Willem a bisa.