KRALENDIJK- E kantidat di pasahero ku ta yega i sali na aeropuerto internashonal di Boneiru a krese te na 470,456 na 2024, un oumento di 7.8% kompará ku 2023 i 23% mas pasahero ku na 2019, e último aña promé ku e pandemia di COVID-19. 

Den e di kuater kuartal, e kantidat di pasahero a oumentá signifikantemente ku 14% kompará ku e mesun kuartal di aña pasá, ku luna di desèmber ta e luna máksimo ku kasi 20% mas pasahero.

E kantidat di pasahero for di Nort Amérika a krese ku mas ku 44% den e di kuater kuartal i ku kasi 23% riba un base anual. Esaki ta debí prinsipalmente na e lansamentu di Westjet (for di Toronto) i JetBlue (for di New York JFK), pero tambe na prestashonnan fuerte di Delta Airlines, American Airlines i United Airlines. E kantidat di pasahero for di Hulanda a rekuperá ku 7.2% den e di 4 kuartal despues di un bahada mas trempan e aña aki, representando un kresementu anual di 1.6%.

Transporte pa y for di e islanan den Karibe Hulandes a subi ku kasi 6.3%, danki na e desaroyo stabil di aerolineanan regional manera Divi Divi Air i Z Air. E promé aña kompletu di operashon di Winair pa Sint Maarten tambe a resultá den kresementu den e segmento aki, ku ta asina importante pa e habitantenan di Boneiru.

E kresementu den e kantidat di pasahero ta un resultado di e aumento di e kapasidat di hotèl riba e isla den e ultimo añanan. E aeropuerto por lo general por a atendé ku e kresementu bon dor di repartí buelonan mas uniformemente posibel durante dia i dor di bon koperashon ku tur partner.

Ekspanshon

“Nos lo sigui traha riba ekspanshon i fortifikashon di e organisashon den e aña binidero. Ademas, nos lo entregá e iluminashon di pista nobo e primavera aki, e lugá di stashoná outo lo wòrdu ekspandé i e proseso di yegada lo wòrdu mehorá,” segun Maarten van der Scheer, direktor di Bonaire International Airport N.V. (BIA) ta bisa. “Ademas nos a redusí e gastunan di impuesto pa pasaheronan ku ta bula entre Aruba i Korsou, ku lo kondusí na pasashi mas pagabel. Di e manera aki nos ta purba di konektá Boneiru mihó ainda ku e region i mundu.”

Pa 2025, BIA ta antisipá ku e tendensia di transporte lo sigui den mayoria di e segmentonan di merkado. E servisionan nobo programá di JetBlue i Corendon lo operá durante henter aña i lo duna un impulso importante na aksesibilidat di Boneiru durante e temporada haltu i abou. 

Demanda haltu

E demanda pa biahe pa e islanan bisiña i dentro di e region ta keda haltu i BIA ta premirá un oumento leve den e kantidat di buelonan ku avionnan mas grandi entre e islanan e aña aki. Despues ku un konekshon direkto pa Barranquilla na Colombia a keda lansá aña pasá, BIA ta sigui traha pa mas i mihó konekshonnan for di Boneiru pa Latino Amérika.