KRALENDIJK – Entidat Públiko Boneiru (OLB) a dal un stap pa regulá e merkado di bibienda riba e isla. Ku e “Startnotitie Huisvestingsverordening” ta presentá reglanan nobo pa hasi bibiendanan pagabel mas aksesibel pa e poblashon lokal. E medidanan ta enserá entre otro un sistema di pèrmit pa kompra di bibienda i un obligashon pa bo mes bai biba aden. Ounke konseho insular ta karga e intenshonnan aki, ta sali tambe krítika for di pueblo pa e falta di komunikashon rònt di e maneho aki.

E maneho proponé ta dirigí pa protehá e skarsedat di bibienda pagabel. Un punto importante ta ku kumpradónan mester ta un mínimo di 5 aña konsekutivo residente di Boneiru pa bini na remarke pa un pèrmit di alohamentu. Tambe ta proponé un límite máksimo pa bibiendanan ku un balor di merkado te 175% di e garantia nashonal di hipotek, loke aktualmente ta ekivalente na $533.750. Kasnan riba e límite aki ta kai for di e areglo i por kumpra nan sin limitashon.

Un otro medida ta e introdukshon di e obligashon pa bo mes biba aden. Esaki ta nifiká ku ta obligá kumpradónan pa nan mes bai biba den nan kas i no por hür esaki mesora òf uz’é komo un di dos kas. E meta ta pa evitá spekulashon i kompranan di invershon, di moda ku biniendanan ta keda disponibel pa e poblashon lokal. 

Krítika riba komunikashon 

Ounke e ordenansa proponé ta aspirá metanan sosial i ekonómiko importante, ta kehando fuertemente riba medianan sosial tokante e manera ku a komuniká e maneho. Diferente siudadano ta bisa ku no a pone nan na altura di e plannan, mientras tin ku ta bisa ku a “pusha” e maneho sin sufisiente partisipashon.

Un keho ku bo ta tende hopi ta ku informashon tokante reunionnan i e ordenansa ta difísilmente aksesibel. Manera un siudadano ta remarká: “Bo no por ta interesá den algu ku bo no sa. No kada siudadano ta sigui kada reunion di konseho insular.  Mayoria no ta hasi esei.” Esei ta lanta e pregunta si Entidat Públiko Boneiru a hasi sufisiente pa enbolbí habitantenan den e proseso di tomo di desishon.

Miembro di konseho insular Daisy Coffie a defendé su mes fuertemente kontra e krítika. E ta enfatisá ku e ordenansa tin simannan kaba riba agènda i ku a publiká tur informashon via e plataforma di Konseho Insular. “Ta anunsiá kada reunion mas ku un siman delantá, tambe via medianan sosial. E interes mester t’ei pa yega na sa e loke bo ke haña sa,” segun Coffie. Sinembargo dudanan ta keda eksistí ku si e forma di komuniká aki tabata efektivo, mirando e kantidat grandi di siudadano ku ta sinti nan kué fo’i base ku e medidanan.

Ordenansa ta sigui

Apesar di e krítika ta parse ku e ordenansa ta sigui. Den luna di dezèmber siudadanonan tabatin e oportunidat pa duna nan opinion durante e reunionnan di komishon i entretantu konseho insular a aseptá e nota. Entidat Públiko Boneiru lo sigui elaborá riba e konsepto di ordenansa promé ku esaki bira definitívo. 

https://bonaire.nu/wp-content/uploads/sites/4/2025/01/D076342-Startnotitie-Huisvestingsverordening.pdf

https://bonaire.nu/wp-content/uploads/sites/4/2025/01/D081946-Raadsbesluit-betreft-startnotitie-huisvestingsverordening-1.pdf