RINCON – S.V. Independiente a optené djadumingu anochi un viktoria krusial den e lucha pa un lugá den e tòp di e kompetensia. Den un temperatura agradabel di alrededor di 26 grado e ekipo di futbòl Boneriano a derotá S.V. Juventus ku e skor di 1-0. John Alejandro Martinez a hinka e úniko gol di e wega den e di djes minüt. Ku un tiru fuerte, abou den direkshon di e huki na banda drechi a laga e kiper di Juventus sin defensa.

E viktoria tabata hopi importante pa S.V.Independiente, ku sorpresivamente tabata abou den klasifikashon, mientras e temporada anterior e tim a finalisá na di kuater lugá. Ku e tres puntonan e tim ta subi bai di shete lugá, di manera ku nan ta den e kompetensia pa un lugá den top seis. E seis mihó timnan ta posishoná nan mes pa e asina yamá Kaya 6, un kontinuashon di e torneo mas lat e aña aki.

Despues di e kompetensia dirigente di tim Johan Palacios, ku ta prosedente di Colombia, a papia positivo di e prestashon di su tim. “Tabata un kompetensia fèrfelu kontra Juventus, pero awe si nos a hunga bon huntu. Nos ta kere den un lugá huntu ku e seis mihó timnan. Es mas, nos meta ta pa bira kampion e aña aki. Nos tin  un tim fuerte ku hungadónan bieu i hungadónan nobo ku resientemente a djòin. Nos tin hungadónan por ehèmpel di Colombia, Ecuador, Venezuela i Perú. Ta un grupo variá i motivá,” segun Palacios.