RINCON – A para e kompetensia di futbol Boneriano temporalmente despues di un insidente serio ku a tuma lugá durante e wega entre Juventus i Vespo riba 31 di yanüari. Den e di 67 minüt di e wega a duna un karchi kòrá, pa despues e situashon a eskalá por kompleto.

E hungadó ku a haña e karchi kòrá no por a dominá su emoshonnan. Despues di e ekspulshon el a dal e rèfri den su kara. E víktima tabata sangra for di su boka. E agreshon tabata motibu pa e rèfri hasi denunsia mesora na polis. Un bosero di bònt di futbòl a laga sa ku apsolutamente no ta tolerá semehante maltrato. Futuro di e hungadó konserní dentro di e kompetensia ta mustra sumamente insigur. 

Komo konsekuensia di e insidente e bònt a disidí pa para e kompetensia inmediatamente. A posponé e siguiente weganan:

• 2 di febrüari 2025: Arriba Perú vs. Vitesse
• 3 di febrüari 2025: Atlético Flamingo vs. Real Rincon
• 5 di febrüari 2025: ATC vs. Young Boys

No ta konosí ainda ki dia i si ta rekuperá e weganan ku a posponé. Tambe ta keda dudoso kon e kompetensia lo sigui.