ORANJESTAD – Na St. Eustatius a firmá kòntrakt pa e siguiente fase di e proyekto pa stabilisá The Cliff na Lower Town.

E proyekto, ku tin komo meta redukshon di posibel daña okashoná pa kaida di piedra, lo wòrdu ehekutá pa Acrobat X B.V. na nòmber di gobièrnu di St. Eustatius. Ku un presupuesto di mas di 19 mion Euro, ta sperá ku e proyekto lo wòrdu finalisá den 20 luna.

Despues di finalisashon di e proyekto, tanto e planta di St. Eustatius Utility Company (STUCO) komo e edifisionan di Orange Bay Hotel, ku ta propiedat di Eco Statia, lo ta protehá for di erosión. Gobièrnu di St. Eustatius ta mustra gratitut pa e sosten finansiero di gobièrnu Hulandes. E proyekto ta forma parti di un programa mas amplio pa kombatí erosión i protehá naturalesa, inkluyendo un plan pa maneho di awa i remové di animalnan ku ta bai pasturá liber.

Pasenshi

Públiko ta wordu pidí pa tin pasenshi i pa duna koperashon durante ehekushon di e proyekto di estabilisashon di klif, ku ta kai pa gran parti huntu ku e proyekto di Orange Bay Road. E polítika di zero toleransia pa animalnan ku ta bai rond den klif na Lower Town ta wòrdu mantené.

Tur animal ku ta wòrdu enkontá ariba, riba òf bou di klif lo wòrdu kitá for di e área pa gobièrnu di St. Eustatius.