KRALENDIJK – E siman tras di lomba, di 12 pa 16 di febrüari, e agentenan aspirante di Kuerpo Polisial Hulanda Karibense a kore stazje pa di 3 biaha, pero awor den unifòrm ofisial di polis. 

Durante di e stazje aki e agentenan aspirante por a hinka loke nan a siña tokante prosedimentu represivo i preventivo den práktika. Asina nan por a kontrolá riba kumplimentu ku reglanan, ku komo meta buska situashonnan indeseá, pero tambe ehekutá aktividatnan ku mester pa prevení ku ta kometé un echo kastigabel.

A roster e agentenan aspirante den diferente ‘ploeg’, riba diferente orario di dia. Entre otro a asigná tareanan na nan i nan a opservá loke e otro kolega agentenan ta hasi, esakinan tur bou di guia di nan guiadó di práktika. Esakinan ta agentenan ku hasi un estudio spesial pa esaki.

Mas aleu nan por a trein tuma keho (aagifte)  simpel. Aki por pensa riba un maltrato leve, ladronisia òf destrukshon.

Lo bai sigui mas periodo di stazje kaminda por mira e agentenan aspirante den e unifòrm ofisial di KPCN.