WILLEMSTAD/PHILIPSBURG — Banko Sentral di Kòrsou i St. Maarten (CBCS) a publiká su Informe Anual di 2023, dunando un bista amplio di su governance, strategia, aktividatnan i situashon finansiero pa 31 di desèmber 2023. Segun e informe, CBCS a sera 2023 ku un ganashi di NAf 148.474.

E resultadonan di CBCS pa 2023 ta mustra un oumento fuerte den entrada di interes kompará ku 2022. E oumento akí, na balor di NAf 29,8 mion, ta den liña ku e oumento den tasa di interes internashonal. E entradanan generá a base di aktividat di supervishon a baha ku NAf 1,1 mion te na NAf 10,4 mion, miéntras ku e oumento den kosto ta kuadra básikamente ku e nivel di inflashon.

Na 2023 i yanüari di 2024, CBCS a bende 29,7% di su reserva di oro pa asina optimalisá su reserva i su entradanan riba término largu. E balor respektivo na dòler estadounidense a ser invertí den bono di estado. E transakshon akí no tabatin efekto riba e resultado di 2023, ya ku a buk e ganashi riba Banko su reserva asigná. 

Sinembargo, di 2024 padilanti, e transakshon akí lo kontribuí fuertemente na CBCS su kapasidat pa generá entrada, ya ku e invershon den bono di estado lo generá ingreso adishonal supstansial den futuro.

Detaye

Pa mas detaye, e Informe Anual di 2023 kompleto ta disponibel riba wèpsait di CBCS na: www.centralbank.cw/publications/annual-report