KRALENDIJK –  Den nos rúbrika ‘Bèk na Boneiru’ nos ta sigui personanan Boneriano ku a lanta na Boneiru, a traha òf studia den eksterior, pero despues ta bini bèk atrobe. Den e di djestres seri nos a papia ku Genesis Saragoza. El a lanta na Boneiru, studia na Hulanda i awor e ta bosero na Kuerpo Polisial Karibe Hulandes (KPCN).  Abo tin, òf bo tambe konosé un hende ku un storia úniko? Duna redakshon un tep.

E ta un storia konosí. Mayornan di hopi Boneriano hóben mester a desvia pa Kòrsou pa nasementu di nan yu. E hòspital na Boneiru no tabatin e posibilidat pa duna siguridat di un nasementu salú riba e isla. Asina a sosodé tambe ku Genesis Saragoza. El a nase na Kòrsou, pero despues di un par di dia nan a sali bèk atrobe pa Boneiru.

Saragoza ta konta di su periodo kòrtiku na Kòrsou: “Realmente mi a nase na Willemstad, pero mi ta konsiderá mi mes komo un bèrdadero Boneriano,” e ta bisa. Su mayornan, prosedente di Repúblika Dominikana, a topa otro na Boneiru i nan kultura a laga un influensia permanente serka dje. “Na kas nos tabatin hopi influensia di e kultura Dominikano, ku e músika i e kuminda, pero riba kaya i ku amigunan mi a haña e influensia Boneriano,” Saragoza ta splika.

E storia di Saragoza ta unu di diversidat kultural. Na kas tabata papia Spañó, spesialmente su tata, mientras su mama tabata papia tantu Spañó komo Papiamentu. E bilinguismo aki a yud’é komprondé i brasa vários kultura. “Riba kaya i ku amigunan mi a haña e influensia Boneriano bèrdadero; spesialmente e kuminda tabata otro ku na kas,” Saragoza ta bisa ku un sonrisa.

Na edat hóben el a muda ku su famia pa New York, un siudat ku tabata parse di ta un soño pa hopi imigrante di Repúblika Dominikana. “Mi mayornan tabata hóben i kier a bai New York, e siudat di posibilidatnan,” Saragoza ta kòrda. “Akinan mi tabata na skol ku solamente muchanan di abla Spañó. I pa straño ku por parse, mi tabata haña un materia so na Ingles. Esei tabata pekuliar, pasobra New York ta un siudat di abla Ingles .”  E kongestion di e siudat i e distansha pa bini nan isla stimá a pone ku e famia a regresá Boneiru despues di dos aña. 

E regreso pa Boneiru sinembargo no tabata sin reto. Saragoza, ku e tempu ei tabata un mucha ainda, no tabata papia Papiamentu mas. E idioma ku el a siña den su promé añanan riba e isla. “Tabata un reto pa siña e idioma di nobo, spesialmente pasobra skolnan na Boneiru a kaba kambia pa Papiamentu den enseñansa,” e ta konta. Sinembargo Saragoza a adaptá su mes lihé, sostené pa su propio kuriosidat i e ayudo di su famia i su amigunan.

Saragoza su biahe a sigui ora nan a muda ku henter famia pa Hulanda dia ku e tabatin 11 aña. “Mi a biba dos aña na Den Haag, pero mi tata a haña fastioso pa siña e idioma i tabata sinti falta di e kalor di Boneiru,” Saragoza ta splika bou di harimentu. “Nèt mi tabata kuminsá siña papia Papiamentu atrobe, pero e ora ei mi mester a siña un idioma di nobo atrobe, esta Hulandes.” E eksperensianan aki den eksterior a forma su imáhen di mundu i a fortifiká su amor pa su isla.

Estudio na Hulanda

Despues di su skol sekundario Saragoza a disidí di amplia su horizonte i a bai Hulanda bai studia na Hanzehogeschool na Groningen. El a skohe pa e estudio di Komunikashon Internashonal, un estudio ku ta prepar’é pa un karera kaminda e por uza su desendensia multikultural. “Tabata un reto pa studia na Hulanda, spesialmente durante e wenternan friu,” Saragoza ta hari. “Pero mi a siña hopi tokante diferente kultura i kon esakinan ta influensiá e manera di komuniká.”

E pandemia sinembargo a trese Saragoza bèk Boneiru, kaminda semper e tabata anhelá pa bolbe bèk. “Mi a realisá kon importante tabata p’ami pa ta na kas bèk, rondoná di famia i den mi propio kultura,” e ta bisa. Na Boneiru Saragoza a enkontrá su vokashon komo konsehero di komunikashon i bosero na polis (KPCN), un ròl kaminda e por uza su abilidatnan i pashon pa servisio na komunidat.

“Mi ta haña tremendo pa ta na Boneiru,” Saragoza ta bisa. “E isla ta pas perfektamente serka e hende ku mi ta. E kalor, e kultura i e dinamismo sosial ta hasi’é  e sitio perfekto pa biba i traha.” Su eksperensia internashonal ku el a haña durante su estudio i trabou na Hulanda, a ámplia su perspektiva i a prepar’é riba e retonan úniko ku Boneiru ta brinda.

Retonan den su trabou

Saragoza ta enfatisá e importansia di komunikashon dentro di e organisashon di polis i komunidat. “Ta krusial ku komo polis nos ta transparente i habrí pa públiko. Nos ke pa e hendenan sinti nan sigur i ku nan tin konfiansa den nos organisashon,” e ta splika. E ta traha na inisiativanan manera kambio di imáhen di polis i kampañanan pa oumentá e visibilidat i aksesibilidat di agentenan di bario.

Apesar di e retonan riba e isla i den su trabou, Saragoza, ku ta positivo, ta mira e futuro di Boneiru optimista. “Tin asina hopi posibilidat akinan. Ta importante pa posishoná bo mes vulnerabel i purba kosnan nobo. Mediante mi eksperensianan den eksterior mi a siña ku tin biaha hopi mas ku nos ta kere ta posibel.”

Komo profeshonal ambisioso e ta keda hasi esfuerso pa e komunidat i e ta spera di hasi un impakto permanente na Boneiru. “Mi ke keda krese i kontribuí na desaroyo di e isla. E ta un bon sentimentu pa forma parti di algu mas grandi i mi ta deseá pa traha huntu ku mi koleganan i komunidat na un mihó futuro.”