Representante Permanente di Hulanda na Konseho di Oropa, señora Tanja Gongrijp, a invitá un delegashon di e parti karibense di Reino i Hulanda pa asistí na un konferensia na Strasbourg. 

E invitashon a bini despues di un konsulta produktivo ku e partisipantenan anteriormente e aña aki. E konferensia a brinda oportunidat pa interkambio tokante ratifikashon i implementashon di e Tratado di Istanbul. E Tratado tin komo meta pa prevení, persiguí i eradiká violensia kontra hende muhé di tur edat, i violensia doméstiko.

Konseho di Oropa ta un organisashon Oropeo den kua gobièrnunan di 46 estado miembro ta representá, ku e meta pa yega na akuerdonan importante pa derechi humano, estado di derechi i demokrasia na Oropa. E Tratado di Istanbul, ku Hulanda a ratifiká dia 18 di novèmber 2015, ainda no a keda ratifiká dor di e parti karibense di Reino. Den Reino, e kuater paisnan (Hulanda, Aruba, Kòrsou i Sint Maarten) i e entidatnan públiko Boneiru, Saba i Sint Eustatius, ta traha huntu pa logra ratifikashon di e tratado na e islanan den e parti karibense di Reino. Durante e konferensia representantenan di e islanan a partisipá na konsulta ku estadonan miembro chikitu di Konseho di Oropa, ku ya a ratifiká i implementá e tratado, manera Irlanda i Malta.

E komponentenan mas importante di e programa a inkluí partisipashon na vários tayer tokante tópikonan klave, entre otro Komishon di Lanzarote, Komishon pa Prevenshon di Tortura i un bishita na Korte Oropeo di Derechi Humano. A pone atenshon spesial na prevenshon di tur forma di violensia kontra hende muhé, akumulashon di dato riba violensia kontra hende muhé, dunamentu di servisio di sosten pa víktima, evaluashon di riesgo i programa pa malechor. E delegashon a asistí tambe na un presentashon di Ombudsman di Hulanda i di Sekretariado di Istanbul na Konseho di Oropa, inkluyendo e trabou di GREVIO (Grupo di Ekspertonan pa Akshon kontra Violensia kontra Hende Muhé i Violensia Doméstiko). GREVIO su ròl ta pa vigilá implementashon di Tratado di Istanbul i duna sosten tékniko na estadonan miembro.

E partisipantenan a ekspresá nan sinsero gratitut na señora Tanja Gongrijp i su tim pa a hasi e bishita di trabou importante aki posibel, den kolaborashon ku Ministerio di Asuntunan Interno i Relashonnan den Reino i Ministerio di Salubridat, Bienestar i Deporte.