KRALENDIJK — Den kòmbersashon ku Bonaire.nu Edilse Goeloe ta konta tokante su biahe komo director di FKPD. Goeloe a guia e fundashon dor di un transformashon remarkabel. E aña aki FKPD, e úniko fundashon riba islanan BES ku ta komprometé su mes pa hendenan ku un limitashon físiko i/òf mental, ta selebrá su 45 aña. Un logro ku no ta marka solamente un historia largu, pero tambe un era nobo di kresementu i perfekshonamentu bou di guia di Edilse.

“Na FKPD tur kos ta drei rònt di kuido di nos klientenan,” Edilse ta kuminsá. E ta deskribí kon e fundashon a ankra den e sosiedat, lantá pa mayornan den Rincon 45 aña pasá, ku e meta pa ofresé un lugá sigur i aktividatnan durante dia na muchanan ku limitashon. E kompromiso fuerte ku e sosiedat ta keda e nukleo di e mishon di FKPD.

Bou di guia di Edilse FKPD a hasi un kresementu impreshonante. “Mi no mag bisa, podisé komo direktor, pero e kresementu berdadero a kuminsá apenas tres aña pasá, ku énfasis riba kalidat di bida, kuido, i e ambiente di biba i traha di nos guiadónan,” e ta divulgá. E enfoke tabata riba mehorá kalidat di bida di e klientenen, kalidat di kuido i e kondishonnan di trabou pa e guiadónan i tambe riba implementashon di infrastruktura nobo di ICT.

Inklushon

Un di Goeloe su metanan mas importante ta pa promové inklushon. “E momento ku nos a bai un wega di futbòl ku nos klientenan i nos a mira e reakshon di e públiko, mi a realisá ku tabatin un kaminda largu pa bai ainda pa loke ta trata inklushon di nos klientenan den komunidat. E mester ta otro”, e ta enfatisá. Inklushon den e komunidat, den nos kultura, ta esensial. Nos no mester tin bergwensa di nos klientenan. Nan tin e mesun derechonan ku tur hende.”

Edilse ta papia abiertamente di e desafionan ku el a topa ora el a asumí su funshon, manera profeshonalisá kuido i maneho di personal. Hopi guiadó no tabatin diploma, i FKPD tabata enfrentá defisiensianan finansiero i operashonal. Apesar di e opstákulonan aki e formashon den kuido i duna guia di Edilse a yuda ku FKPD a progresá konsiderablemente.

Futuro 

Mirando futuro, Goeloe ta kompartí su plannan ambisioso pa FKPD, manera lantamentu di un sentro di konosementu LVB (Limitashon Intelektual Leve) na Boneiru i ámplia asistensia ambulante pa Saba i St. Eustatius. E koperashon ku otro institutonan di kuido i e enfoke riba inklushon i aktividatnan eksterno ta aspektonan klave di su vishon.

Reflekshonando riba su hubileo di tres aña komo direktora, Edilse ta papia ku pashon di su amor pa e klientenan i su dedikashon pa nan bienestar. “Tabata añanan difísil, pero ora mi mira kon kontentu nos klientenan ta, kon satisfecho e empleadonan ta ku nan kondishonnan di trabou ku a drecha, mi sa ku tabata bale la pena,” e ta bisa. “E amor i vulnerabilidat di nos klientenan a siñami hopi. Ta mi mishon pa profeshonalisá FKPD, pa nos klientenan i nos tim.”

Goeloe ta finalisá ku un mensahe fuerte na komunidat: “Inklushon ta esensial. Nos no mester tin miedu di nos klientenan òf tin bergwensa di nan. Nan meresé nos amor, rèspèt i akseptashon total.” E ta enfatisá ku FKPD ta para pa kalidat i ku e ta ansioso pa kompartí nan éksito- i kontribushonnan na komunidat.

Mientras FKPD su di 45 aña ta aserkando, ta evidente ku e fundashon no solamente a floresé bou di guia di Goeloe, pero ku a habri un kapítulo nobo di speransa i inklushon pa su klientenan. “Nos klientenan tin mes tantu derecho riba un bida kompleto manera kualke hende. A bira tempu pa nos kibra e tabú i risibí tur hende ku brasanan habrí.”