KRALENDIJK- Siman tras di lomba, diputado Hennyson Thielman a hasi un bishita na e treinen di Housekeeping, kaminda e promé kursistanan ta sigui formashon grátis. 

Esaki ta e di dos kurso grátis den un seri di kurso di hospitalidat ku Entidat Públiko Boneiru ta finansiá. Un inisiativa pa invertí den poblashon lokal di Boneiru i pa krea oportunidat pa funshonnan mas mihó pagá.

E treiner Maraguanela Martis ta siñando e grupo kompletamente yen di 17 kursista tur detaye di e ofishi, di manera ku na final di e kurso nan por traha mas efisiente ku ménos esfuerso físiko i pa nan por anda ku enfoke riba wéspet ku turista.

Durante su bishita diputado Hennyson Thielman, den un diskurso di motivashon a pone énfasis riba e echo ku ta importante pa finalisá e kurso. “Ku un sertifikado den bo man, tin mas posibilidat pa sigui krese i tambe den trabounan ku ta paga mihó”, asina e diputado a bisa. 

Gratis

Fundashon Forma, den kolaborashon ku Entidat Públiko Boneiru, TCB i BONHATA, riba término korto ta ofresé mas kurso grátis ainda, entre otro: hóreka (sirbi mesa, bartènder, asistente den kushina), abilidat sosial (pa por anda na un manera plasentero ku otronan i saka mas probecho for di esaki) i enfoke riba kliente i servisio.