KRALENDIJK – Diferente media Hulandes a hasi menshon di fayesimentu di Meine Breemhaar, doño i e hòmber tras di e plannan grandi pa Plantashi Bolivia.

E plannan di Breemhaar tabata kontroversial serka gran parti di poblashon, spesialmente e kantidat di kas ku lo a realisá den e área. Otro persona sinembargo tabata eksitá di e plannan ku nan tabata deskribí komo inovativo i bon pa desaroyo di e isla.

E Kolegio Ehekutivo ku tin sosten di PDB/M21/Vrolijk a wanta un tiki ku e kòmbersashonnan ku Breemhaar, pasobra nan no tabata di akuerdo ku e plannan ku te ainda tabatin riba mesa. No ta konosí ki konsekuensia e fayesimentu di Breemhaar tin pa e área ku ta kubri komo 10% di e superfisie total di e isla. 

Breemhaar tabata un komersiante eksitoso i doño di diferente empresa na Hulanda. Tambe e tabata den direktiva di klup di futbòl PEC Zwolle. Ku su imperio di nogoshi el a akumulá un kapital konsiderabel. Promé ku su fayesimentu 1 di yanüari último Breemhaar tabata algun tempu terminal kaba.