KRALENDIJK- Djaluna último a kompletá e trayekto di e promé parti di aña di e programa di Método Veder, ku por bai apliká na benefisio di 24 ora di kuido. E training aki di 3 dia a kuminsá 22 di mart último komo parti di un akuerdo di koperashon entre Fundashon Mariadal Bonaire i dirèksi di Theater Veder Nederland pa por a duna e treinen di e Método Veder aki, ku ta inovativo den kuido na Bonaire.

Ku hopi orguyo i satisfakshon e seis partisipantenan di Zorg en Welzijn Groep, di Fundashon Kuido pa Personanan Desabilitá (FKPD) i di Kas di Kuido / Fundashon Mariadal a risibí  nan sertifikado. Presidente di direktiva di Fundashon Alzheimer Bonaire Sr Evert L. Piar a hasi e entrega na nòmber di direktor di Theater Veder, Sra Maria R.Westra i esaki a tuma lugá na Fundashon Mariadal Academy.

Mas fecha

Fundashon Alzheimer Bonaire ta sumamente kontentu ku por a kompletá e trayekto aki di e promé parti di aña i ku por a partisipá e fecha nobo pa e programa di e di dos parti di aña.

Fechanan di e entrenamentu ta 22 di sèptèmber, 11 di òktober i 2 di novèmber próksimo i seis otro partisipante di personal di kuido di nos institutonan di kuido di Bonaire ta bai haña oportunidat pa nan tambe por partisipá na e “online training” spesial aki.

E partisipantenan tabata hopi ntusiasmá ku nan sertifikado di tur e elementunan di Método Veder ku nan a siña i ku nan por bai apliká. Esaki ta bai ta na bienestar di esnan ku nesesidat di kuido na Boneiru i tambe pa kuido en general.