KRALENDIJK – Den e di kuater trimèster di 2024, produkto- i servisionan di konsumidó na Boneiru tabata 1,8 porshento mas karu ku un aña anterior. Den e di tres trimèster, ainda e inflashon tabata 2,5 porshento. Esaki CBS ta informá a base di e índise di preis di konsumidó Hulanda Karibense.

Na Sint Eustatius e preisnan riba un base anual tabata 3,4 porshento mas haltu den e di kuater trimèster di 2024, den e di tres trimèster di 2024 e inflashon tabata 3,2 porshento. Na Saba e inflashon tabata 2,7 porshento den e di kuater trimèster di 2024. Un trimèster anterior, ainda esaki tabata 1,9 porshento. 

Preisnan na Boneiru 0,5 porshento mas abou kompará ku e trimèster anterior

Preisnan na Boneiru a baha 0,5 porshento den e di kuater trimèster kompará ku e di tres trimèster. E bahada aki tambe ta kousá pa gastunan di transporte; pasashi di buelo a bira 8,5 porshento mas barata i preis di gasolin a baha 6,1 porshento kompará ku e di tres trimèster. Paña i sapatu tambe a bira mas barata, e preisnan a baha 1,9 porshento. Di otro banda, preisnan di produkto di salú a subi 1,8 porshento kompará ku e di tres trimèster.  

Preisnan na Sint Eustatius 0,1 porshento mas haltu ku den trimèster anterio
Na Sint Eustatius, preisnan di konsumo a subi 0,1 porshento den e di kuater trimèster di 2024 kompará ku e di tres trimèster. Komestibel a bira 1,7 porshento mas karu. Entre e komestibelnan, preisnan di bèrdura i fruta fresku a subi. Preis di gasolin i disel den e di kuater trimèster a sigui stabil kompará ku e di tres trimèster di 2024. 

Diferente grupo di produkto a frena e oumento di preis e trimèster aki. Por ehempel, preisnan di pasashi di buelo a baha 3,7 porshento kompará ku e di tres trimèster. Paña i sapatu den e trimèster aki a bira 1,1 porshento mas barata. 

Preisnan na Saba a subi 0,2 porshento kompará ku e trimèster anterior

Na Saba, e preisnan den e di kuater trimèster di 2024 a subi 0,2 porshento kompará ku e trimèster anterior. Preisnan di komestibel i bibida a subi 3,0 porshento den e di kuater trimèster kompará ku e di tres trimèster. Aki tambe e preisnan di bèrdura i fruta fresku a subi.

Di otro banda, preisnan di kombustibel di outo, produkto di salú i artíkulo di higiena a baha den e di kuater trimèster di 2024. Asina, preis di gasolin a baha 5,2 porshento kompará ku e trimèster anterior.

Desaroyo di preis promedio 2024

Na 2024, e desaroyo di preis promedio na Boneiru tabata 2,6 porshento mas haltu ku 2023. Na Sint Eustatius, e preisnan tabata 2,2 porshento mas haltu ku 2023 i na Saba 2,1 porshento mas haltu. Riba tur e islanan, esaki tin di haber ku e preisnan mas haltu pa komestibel, transporte i horeka. Ademas na Boneiru, produkto i servisio riba tereno di salú a bira mas karu. Na Sint Eustatius, preisnan pa bibienda, awa i energia a subi. Na Saba, e preisnan pa enseñansa a subi. 

Sifranan tentativo

A adaptá e sifranan tentativo pa e di tres trimèster di 2024 pa Sint Eustatius i Saba debí na informashon adishonal ku a drenta despues. E sifranan pa e di kuater trimèster di 2024, i ku esei e sifranan anual pa 2024 tambe, ta tentativo i lo stipulá nan definitivamente na momento di publikashon di e promé trimèster di 2025. 

Fuentenan: 

StatLine – Caribisch Nederland 

https://opendata.cbs.nl/CBS/nl/dataset/84046NED/table?dl=BFA9