KRALENDIJK- Kontrario na komunikashon na fin di aña 2024, e karchinan bieu di  Bankomátiko di MCB Boneiru, lo keda bálido ainda te ku fin di yanüari 2025. Esaki pa fasilitá kliente di e banko ku ainda no a risibí nan karchi nobo di Bankomátiko+ ainda. 

Inisialmente, MCB a informá ku e pasnan bieu lo a stòp di funshoná for di dia promé di yanüari 2025. Sinembargo, den e periodo aki, e karchinan bieu lo tin un funshonalidat un poko limitá. 

Asina por paga solamente kaminda tin un mashin di swap di MCB. Tambe pa loke ta lantamentu di sèn for di Bankomátiko, esaki ku e karchi bieu por solamente na Bankomátiko di MCB mes. 

Esfuerso

Ounke na promé instante tabatin vários klientenan ku no a risibí e karchi nobo, e personal di banko a traha èkstra duru promé ku fin di  aña pasá pa yuda klientenan pa haña nan pas nobo. Den algun kaso ta sinembargo, mester pidi un kopia di e pas, ku ta disponibel pa e kliente despues di mas o ménos 10 dia di trabou.