KRALENDIJK – E Kódigo di Protekshon kontra Violensia Doméstiko i Maltrato di Mucha (HGKM), ku ta na vigor for di 1 di yanüari 2025, ta un paso importante na Hulanda Karibense den e lucha kontra violensia doméstiko i maltrato di mucha. E regulashon nobo aki ta duna sosten tantu na profeshonalnan komo na habitantenan di Hulanda Karibense dor di traha riba prevenshon, kolaborashon i sosten.

Kódigo di Protekshon: un rekurso pa tur hende

E Kódigo di Protekshon ta kreá spesífikamente pa yuda profeshonalnan rekonosé i atendé señalnan di violensia doméstiko i maltrato di mucha i pa guia nan pa tuma e paso korekto ora nan ta sospechá un situashon ku no ta seif.

Pa profeshonalnan, manera dosente, dunadó di kuido i trahadó sosial, e Kódigo di Protekshon ta duna indikashon kla pa yuda tuma desishonnan na momentu ku un hende mester di protekshon. Esaki ta inkluí ku semper nan por konsultá ku otro kolega i buska konseho na e Sentro pa duna konseho i mèldu violensia doméstiko i maltrato di mucha (AMHK). Tambe e pasonan di e Kódigo di Protekshon ta garantisá ku e profeshonalnan semper ta papia promé ku e siudadano, promé ku nan disidí kiko tin ku pasa pa protehá e persona.

Habitantenan tambe por haña yudansa si nan ta mira situashonnan ku no ta seif den nan kas òf serka un otro hende. Na e sentro pa tuma konseho por haña konseho tokante kiko por hasi si tin sospecho di violensia doméstiko òf maltrato di mucha. E meta no ta solamente pa identifiká problema pero tambe pa haña solushon huntu, ku por mehorá e situashon.

Na kada isla tin un punto pa duna konseho ku ta duna konseho apropiá den kada situashon. E puntonan pa duna konseho aki ta yuda kontestá pregunta, sostené i atendé kaso si ta nesesario. Na Boneiru e sentro aki yama Guiami i ta kai bou di Sentro Akseso, alkansabel via 0802-0802. Na St. Eustatius, e sentro ta forma parti di e Unidat di Sosten Sosial di Entidat Públiko St. Eustatius (OLE) i ta disponibel via 3184837. Na Saba, e sentro ta kai bou di e tim di Departamentu di Desaroyo Komunitario & Kultura di Entidat Públiko Saba (OLS) i ta disponibel via 416 6936 òf 416 3053.