KRALENDIJK – Kolegio Ehekutivo kompleto di Boneiru a hiba 13 di yanüari un kòmbersashon di sera konosí ku minister di Hustisia & Siguridat, David van Weel, durante su bishita di trabou na e isla.

Banda di un enkuentro ku e gobièrnu di e isla e minister a bishitá tambe instanshanan manera Ministerio Públiko, KPCN, i JICN, e Institushon Hudisial Karibe Hulandes.

Kolegio Ehekutivo a trese vários tópiko na konosementu di e minister, entre kua e falta di e Lei Bibob i e But Atministrativo, ku ta importante pa kombatí práktikanan di labamentu di plaka i pa promové bon gobernashon. Tambe e kolegio a insistí riba ratifikashon di e Tratado di Istanbul pa Boneiru, Saba i Sint Eustatius, dirigí riba e manera di ataká violensia (doméstiko) kontra hende muhé i mucha muhé.

Positivo

Tambe a papia riba e plannan pa un Sentro di Hustisia pa Famia i un konvenio pa skolnan seif, kaminda koperashon ku KPCN ta para sentral. E Kolegio Ehekutivo ta konsiderá ku e kòmbersashon ku Van Weel a bai positivo i ta bisa di spera mas koperashon den futuro ku e minister.