A kolektá mas ku 6000 euro via un akshon di finansiamentu kolektivo pa e soño di Billy Valentijn pa e por bini Boneiru un biaha mas. E éksito grandi a pèrkurá pa hopi alegria serka e hóben mes. Su mama tambe ku ta biba na Boneiru ta loko di kontentu: “Mi ta asina kontentu ku e yudansa di te awor. Hopi gana mi tin di kana ku Billy den Playa i bai bebe algu kuné na Karel’s Beach Bar.”

Nos ta kore den Kunuku. E naturalesa bunita na ámbos banda di kaminda, ta reda ku nos ta yega na un sitio spesial. Mei mei den naturalesa tin un restorant dekaí. Ta evidente si ku aki a sosodé hopi kos antes. Na e forma di pafó por mira bon kla ku antes a fiesta hopi aki nan. Awor aki esei no ta posibel mas. E plachinan di dak ta kologá ainda peligroso na un par di skruf. Na e sitio spesial aki nos ta topa e mama di Billy Valentijn. E hóben, ku tin un desabilidat, tin un soño grandi ainda. Bolbe un biaha mas na su Boneiru stimá. Algu ku e lesadónan di Bonaire.nu ta dese’é den un tiru. 

“Despues ku Billy mester a bai Hulanda bèk 21 aña pasá, mi tambe a biba einan un temporada. Mi tabata serka di Billy. Mi stima mi yu hòmber hopi. I mi ta sinti su falta”, segun mama Ursulinda Trenidad.

Di bishita serka Ursulinda Trenidad, mama di Billy

Operashon grandi 

Billy a lanta na Boneiru, pero forsá mester a muda pa Hulanda. E hóben ku ta lucha ku kontrakshonnan muskular tin un soño: ‘landa den awanan blou di Boneiru’. Pa por realisá e soño aki mester kolektá hopi sèn. Banda di esei mester sinkronisá un ke otro ku KLM pa laga realisá e proyekto.

“Si, mi sa ku e tin hopi deseo pa hasi esaki. Ami no por landa. Pero si Billy bini akinan, mi ta laga nan konvensémi pa bai landa kuné. Mi ke ta konstantemente kuné, ora e ta aki nan”, segun Trenidad.

Billy ku su mama na Hulanda

Ten’é den mi brasa 

Pa henter e operashon aki mester di 30.000 euro. E gastunan no ta pa pasashi so. Mester kubri tambe asistensia den avion i riba e isla, akomodashon i transporte. Despues di e promé akshon gofundme mester ainda 9000 euro.

Pilotonan di KLM tambe a tuma kontakto. Organisatoriamente nan no por yuda. Personal di KLM ta duna sosten finansiero si. Mientrastantu tin kontakto dirèkt ku e Hefe di Stashon di KLM na Boneiru. E organisashon ku ta purbando pa trese Valentijn Boneiru ta konta ku sosten di e kompania di aviashon.

E ruta pa bai e kas di e mama di Billy ta di tera

“Mi ta spera ku un dia e bin hospedá den mi kas”, segun mama Valentijn. “Tambe lo mi tin gana di kana kuné den Playa.  Bebe un kòfi na Karel’s Beach Bar, parsemi agradabel. Nan tin un plateau ku ta hasi posibel pa kore bai kuné paden. No ta Billy su soño so pa bini akinan. Ami tambe ta spera di por ten’é pronto den mi brasa atrobe”.