Minister David van Weel di Hustisia i Siguridat ta realisá un bishita di trabou na Boneiru, Aruba i Kòrsou di 12 te ku 17 di yanüari. E bishita tin komo meta pa sera konosí i fortifiká e koperashon ku diferente partner hudisial i atministrativo den e parti karibense di Reino riba tereno di mantenshon di lei i siguridat.

Boneiru

E minister ta kuminsá su bishita di trabou na Boneiru, kaminda e ta sera konosí ku gezaghèber John Soliano i kolegio ehekutivo. Tambe e ta hiba kombersashon ku diferente servisio hudisial, inkluyendo Ministerio Públiko BES, Koninklijke Marechaussee, Kuerpo Polisial Hulanda Karibense, Kuerpo di Bombero Hulanda Karibense i Instituto Hudisial Hulanda Karibense. Tambe e ta papia ku Representante di Reino interino Jan Helmond. Lo pone minister Van Weel na altura di desaroyo- i retonan aktual riba e isla. E ta realisá un bishita tambe na e Sentro Regional di Informashon i Ekspertisia Hulanda Karibense (RIEC CN). 

Aruba
Despues di Boneiru minister Van Weel lo sigui di biahe pa Aruba. Riba programa tin enkuentronan ku Gobernador di Aruba, Promé Minister i Minister di Hustisia i Asuntunan Sosial. Ademas e ta bishitá representashon di Hulanda na Oranjestad i Kuerpo Polisial Aruba. Aki e ta sera konosí ku hefe di kuerpo Ramon Arnhem i e ta realisá un bishita na e kuerpo riba trabou.

Ademas tin riba agènda un bishita na e instalashon pa kima droga i e sistema di radar. E bishitanan akí tin komo meta pa komprondé mihó e aserkamentu lokal pa kombatimentu di droga i siguridat marítimo.

Kòrsou
Ta klousura e bishita di trabou na Kòrsou. Minister Van Weel ta kuminsá aki bishitando Recherche Samenwerkingsteam i warda di polis. Tambe e ta papia ku Kònsùl General di Merka i e ta realisá un bishita na e snoa históriko di Kòrsou.

E bishita di trabou ta suprayá importansia di un koperashon fuerte den Reino pa konhuntamente garantisá mantenshon di lei i siguridat.