KRALENDIJK- Fondo di penshun Karibe Hulandes (PCN) ta subi e penshunnan ku 2.5% for di 1 di yanüari 2025. E indeksashon aki ta sigui e inflashon promedio ku a kalkulá pa Boneiru, Saba i St. Eustatius.

E desishon aki a wòrdu tumá den reunion di direktiva na novèmber 2024, siguí pa aprobashon di Hunta di Supervision, i un konseho positivamente di e órgano di Konseho i Responsabilisashon (AVO).

Danki na un bon resultado di invershonan i e uzo di un tasa di interes promedio, e grado di kubertura di PCN a sigui subi durante e lunanan ku a pasá, pa yega na mas di 134% na fin di novèmber. E método pa traha ku un interes promedio di e último 12 lunanan, ta yuda redusí fluktuashon fuerte den e tasa di interes ku kua e fondo ta traha. 

Aktivo

E indeksashon no ta benefisiá solamente e hende ku ya ta disfrutando di nan penshun. E oumentu ta konta tambe pa partisipante aktivo di PCN, i tambe e asina yamá ‘slapers.’

Partisipantenan aktivo ta tur hende ku ta trahando na un dunadó di trabou ku tin afiliashon na PCN. ‘Slapers’ ta hendenan ku a yega di traha pa un di e dunadónan di trabou aki, pero ku aktualmente ta traha otro kaminda, por ehèmpel pa nan mes kuenta òf den sektor privá.. Pa tur dos grupo, nan benefisio di futuro penshun tambe ta subi ku e porsentaha di 2.5%.

Pa loke ta trata penshonado, esakinan lo risibí e pago adaptá pa promé biaha den luna di yanäri mes.