KRALENDIJK – E aña aki ta 150 aña pasá ku a abolí sklabitut na Hulanda. Pa e motibu ei NTR i NOS ta bini ku un seri konsistiendo di tres parti ‘Slavernij en wij’. E seri ta trata personanan ku a bira katibu na Sürnam, Sint Eustatius, Sint Maarten, Aruba, Boneiru i Kòrsou.

Den e seri aki e presentadónan ta buskando storianan di e forsa di esnan ku a bira katibu na Sürnam i riba Islanan ariba i abou. Den e di tres kapítulo ta trata Aruba, Boneiru i Kòrsou. E presentadó ta buskando e influensia di pasado di sklabitut den presente. E ta haña mesklanan di yerba spesial, muzik di Tambú komo forma di protesta, pero tambe un konsientisashon polítiko kresiente.

Por sigui e seri riba djarason 28 di yüni (Sürnam), djaweps 29 di yüni (Sint Eustatius i Sint Maarten) i djabièrnè 30 di yüni (Aruba, Boneiru i Kòrsou) na NPO 2 pa 19.40 òf na NPO 1 pa 23.40 (ora Hulandes). Por mira e seri for di 28 di yüni kompleto riba NPO Start.