DE BILT/DEN HAAG – Despues di un negosashon di tres dia na De Bilt, e proseso di konsulta ku e Entidatnan Públiko Boneiru, Sint Eustatius i Saba ta kasi finalisá. Kaminda  ta trata algun punto di diskushon e islanan ta haña loke nan ke, pero riba otro puntonan sea no a honra òf no a honra petishon- òf deseonan kompletamente.

E tres islanan ta haña si un representante permanente na Den Haag i ta embolbí nan mas tempran na momento di traha maneho i lei. E prinsipio di ‘comply or explain’ (kumpli òf splika) ta keda e punto di salida pa maneho i ta bini diferente nivel di supervishon finansiero pa e islanan. Asina trabou na midi pa kada isla ta bira posibel.

Pa embolbí e islanan mihó ora ta prepará leinan nobo, ta lanta un grupo di trabou gubernamental konsistiendo di representantenan di Boneiru, Sint Eustatius i Saba i ministerio di BZK. “Mi ta kontentu ku nos por a hiba kòmbersashonnan asina konstruktivo ku otro den un bon ambiente. Mi ta konvensí ku e aporte balioso di e islanan ta hasi e proposishonnan di lei mas mihó. Tabata un enkuentro eksitoso kaminda nos a logra  konsenso tokante e kontenido di ámbos lei. Nos ta bai traha huntu riba nos palabrashonnan  e tempu benidero”, sekretario di estado Alexandra van Huffelen (BZK) ta bisa.

Salario 

Un di e otro puntonan ku a papia riba dje ta e salario di miembronan di konseho insular, diputado- i gezaghebbernan. Ta oumentá esaki na un nivel ku ta komparabel ku esun di gobernantenan sentral na Hulanda Europeo. Na momento di e adaptashon ta tene kuenta ku e peso di e pakete di tarea di e islanan. Ta midi faktornan lokal tambe, manera kosto di bida. Kontrali na e deseo di e islanan e funshon di miembro di konseho insular no ta bira un funshon fultaim. Ta keda trata di un funshon partaim,  pero si ku mihó salario.

Mas miembro pa konseho insular i diputado 

For di e siguiente elekshonnan (2027) ta oumentá e kantidat di miembronan di konseho insular gradualmente. Na promé instante Boneiru ta bai di 9 pa 11, Sint Eustatius di 5 pa 7 i Saba tambe di 5 pa 7. Mientrastantu ta evaluá si ta nesesario pa oumentá e kantidat di miembro di konseho insular pa e siguiente elekshonnan (2031 i 2035). E konsehonan insular ta haña sosten pa ehekutá nan trabounan bon. Pa esaki e ministerio di BZK ta pone tur aña 350.000 euro disponibel pa Boneiru, Sint Eustatius i Saba. Pa e kantidat máksimo di diputado a palabrá di mantené un márgen di 3 te 5 pa Boneiru, 3 te 4 pa Sint Eustatius i 3 pa Saba.

Sobrá palabrashonnan

Den e modifikashonnan presentá di e Lei Entidatnan Públiko BES (WolBES) i e Lei Finansas BES (FinBES) ta ahustá supervishon finansiero na Boneiru, Sint Eustatius i Saba pa oumentá e outonomia lokal.

Dependé di e situashon finansiero i su maneho e nivel di supervishon lo varia, di manera ku ta kumpli ku e deseo pa diferensiá. Ademas ta hasi esfuerso pa finansiamentu strukturá pa tareanan struktural di e islanan, manera ofisina di investigashon IdeeVersa i e Hunta pa Atministrashon Publiko ta rekomendá. E intenshon di e modifikashonnan ta pa mehorá e relashonnan atministrativo i finansiero entre e islanan i Hulanda Europeo, i despues di un proseso di konsulta e leinan di e siguiente trayekto lo drenta na vigor, inkluso konseho di Konseho di Estado i tratamentu den Tweede Kamer.